తెలుగు రాష్ట్రాల్లో గాలివాన దెబ్బ: నలుగురు మృతి, పలువురికి గాయాలు

తెలుగు రాష్ట్రాల్లో గాలివాన తీవ్ర నష్టాన్ని మిగిల్చింది. అనకాపల్లి, కాకినాడ, కర్నూలు, నాగర్‌కర్నూల్ జిల్లాల్లో దెబ్బలు ఎక్కువగా పడ్డాయి.

అనకాపల్లి జిల్లా సత్యవరం గ్రామంలో కొబ్బరి చెట్టు కూలింది. తమలపాకులు సేకరిస్తున్న ఇద్దరు కూలీలు మృతి చెందారు. అదే జిల్లాలోని ముకుందరాజుపేటలో ఇంటి రేకులు పడి ఇద్దరు మహిళలు తీవ్రంగా గాయపడ్డారు.

కర్నూలు జిల్లాలో పందిపాడు వద్ద రహదారిపై ఉన్న ఆటోపై విద్యుత్ స్తంభం పడింది. ఆటో డ్రైవర్ రామకృష్ణ అక్కడికక్కడే మృతి చెందారు. ముగ్గురు ప్రయాణికులు సురక్షితంగా బయటపడ్డారు.

తెలంగాణలోని నాగర్‌కర్నూల్ జిల్లా తాడూరు మండలం గోవిందాయనపల్లిలో పిడుగు పాటుకు గొర్రెల కాపరి మల్లయ్య మృతి చెందారు.

కాకినాడ జిల్లా తుని సమీపంలో కారుపై చెట్లు విరిగిపడ్డాయి. అందులో ఉన్నవారందరూ సురక్షితంగా బయటపడ్డారు. గాంధీ సత్రం మేడపై ఉన్న పెద్ద హోర్డింగ్ కూలి మూడు బైక్‌లు ధ్వంసమయ్యాయి. ఇద్దరికి స్వల్పంగా గాయాలయ్యాయి.

ఉమ్మడి మహబూబ్‌నగర్ జిల్లాలో చెట్లు వాహనాలపై పడ్డాయి. విద్యుత్ వైర్లు తెగిపడ్డాయి. అనేక చోట్ల ట్రాఫిక్ నిలిచిపోయింది. అచ్చంపేటలో మార్కెట్ యార్డులోని మొక్కజొన్న తడిసిపోయింది. అనకాపల్లి జిల్లాలో మామిడి, అరటి పంటలకు నష్టం వాటిల్లింది.