తెనాలిలో న్యాయవాది హుస్సేన్ ఇంటిపై దాడి: కటేవరంలో ఉద్రిక్తత, మాజీ MPP చెన్నయ్యపై ఫిర్యాదు

గుంటూరు జిల్లా తెనాలి మండలం కటేవరంలో న్యాయవాది హుస్సేన్ ఇంటిపై దాడి జరిగింది.

వైఎస్ఆర్‌సీపీకి చెందిన మాజీ ఎంపీపీ చెన్నయ్య, అతని అనుచరులే ఈ దాడికి పాల్పడ్డారని హుస్సేన్ పోలీసులకు ఫిర్యాదు చేశారు. 50 మందికి పైగా వచ్చి తలుపులు, కిటికీలు, చేతిపంపు ధ్వంసం చేశారని ఆరోపించారు. ఇంటి ముందు టెంట్లు వేసేందుకు ప్రయత్నించగా వివాదం చెలరేగిందని ఫిర్యాదులో పేర్కొన్నారు.

తెనాలి బార్ అసోసియేషన్ ఈ దాడిని ఖండించింది. చెన్నయ్య చిన్న కారణానికి 50-60 మంది అనుచరులను తీసుకొచ్చి దాడి చేశాడని, పంపు కాడతో హుస్సేన్‌పై దాడికి యత్నించాడని అసోసియేషన్ ఆరోపించింది. న్యాయవాదులపై ఇలాంటి ఘటనలు పెరుగుతున్నాయని ఆవేదన వ్యక్తం చేశారు.

పోలీసులు కేసు నమోదు చేసి దర్యాప్తు ప్రారంభించారు. ఈ వార్తపై చెన్నయ్య స్పందన తెలియాల్సి ఉంది.