చంద్రగిరి జెడ్పిటీసీ పోలింగ్‌లో ఉద్రిక్తత.. చెవిరెడ్డికి టీడీపీ వర్గం హెచ్చరిక

తిరుపతి జిల్లా చంద్రగిరి నియోజకవర్గంలోని తిరుపతి రూరల్ ZPTC పోలింగ్ కేంద్రాల వద్ద ఉద్రిక్తత నెలకొంది. వైసీపీ నేత చెవిరెడ్డి భాస్కర్ రెడ్డి, టీడీపీ ఎమ్మెల్యే నాని వర్గాల మధ్య వాగ్వాదం చోటు చేసుకుంది.

తిరుపతి జిల్లాలో దాదాపు 35 ZPTC స్థానాలకు పోలింగ్ జరుగుతోంది. జిల్లాలో పోలింగ్ ప్రశాంతంగా సాగుతున్నా, తిరుపతి రూరల్ ZPTC లో మాత్రం ఉదయం నుంచే ఉద్రిక్తత కనిపించింది. ఈ స్థానం నుంచి చెవిరెడ్డి భాస్కర్ రెడ్డి కుమారుడు హర్షిత్ రెడ్డి పోటీ చేస్తున్నారు. విజయం కోసం టీడీపీ, వైసీపీ నేతలు ఇరువైపులా పూర్తి స్థాయిలో దిగారు.

మంగళం పోలింగ్ కేంద్రం వద్ద టీడీపీ ఎమ్మెల్యే నానిని పోలింగ్ బూత్‌లోకి అనుమతించకుండా చెవిరెడ్డి అడ్డుకున్నారు. దీంతో నాని తన వర్గానికి చెందిన పులివర్తి సుధను ఆ ప్రాంతానికి పంపారు. టీడీపీ నేతలను రెచ్చగొట్టవద్దని, ఎన్నికలు ప్రశాంతంగా జరగాలని సుధ హెచ్చరించారు. ఒక్క వీడియో బయటపడినా ఉద్యమం చేస్తామని ఆమె అన్నారు.

లింగేశ్వర నగర్, సాయి నగర్ ప్రాంతాల్లో దొంగ ఓటర్లు ఉన్నారని చెవిరెడ్డి బృందం ఆరోపించింది. ఈ అంశంపై టీడీపీ నాయకులతో వాగ్వాదం జరిగింది. పోలీసులు అక్కడికి చేరుకుని ఇరు వర్గాలను శాంతపరిచి ఆ ప్రాంతం నుంచి పంపించారు.

ఘటన తర్వాత చెవిరెడ్డి తిరుచానూరు పోలింగ్ కేంద్రానికి వెళ్లారు. ఎక్కడా గొడవలు జరగకుండా పోలీసులు అదనపు భద్రత ఏర్పాటు చేశారు.