తిరుమల టీటీడీకి స్పెసిఫైడ్ అథారిటీ.. ఈఓ రవిచంద్ర చైర్మన్

తిరుమల తిరుపతి దేవస్థానం (TTD) ధర్మకర్తల మండలి గడువు ముగియడంతో ఆంధ్రప్రదేశ్ ప్రభుత్వం స్పెసిఫైడ్ అథారిటీని నియమించింది. TTD ఈఓ ముద్దాడ రవిచంద్ర ఈ అథారిటీ చైర్మన్‌గా వ్యవహరించనున్నారు. ఫైనాన్స్ సెక్రెటరీ వినయ్ చంద్, దేవదాయ శాఖ కార్యదర్శి కన్నబాబు సభ్యులుగా నియమితులయ్యారు.

గతంలో స్పెసిఫైడ్ అథారిటీలో దేవదాయ శాఖ ప్రధాన కార్యదర్శిని నియమించేవారు. ఈసారి మాత్రం ఈఓతో పాటు ఇద్దరు ప్రభుత్వ కార్యదర్శులను కలిపి అథారిటీని ఏర్పాటు చేశారు. దీనివల్ల TTD పరిపాలనలో ఆలస్యం లేకుండా అధికారులు నిర్ణయాలు తీసుకోవచ్చని భావిస్తున్నారు.

పాలక మండలి లేని సమయంలో ఈఓ తీసుకున్న నిర్ణయాలకు కూడా పాలక మండలి ఆమోదం తీసుకోవాల్సి ఉంటుంది. పాలక మండలి తీసుకున్న నిర్ణయాలను అధికారులు అమలు చేయాల్సి ఉంటుంది. ఈ అథారిటీ ఏడాది కాలం పాటు, లేదా తదుపరి పాలక మండలి నియమితులయ్యే వరకు కొనసాగుతుంది.

డిసెంబర్ 5వ తేదీ వరకు స్థానిక సంస్థల ఎన్నికల కోడ్ అమలులో ఉంది. దీంతో అప్పటివరకు కొత్త పాలక మండలి నియామకం జరిగే అవకాశం లేదు. ఆ తర్వాత వైకుంఠ ద్వార దర్శనం హడావిడి ఉంటుంది. దీంతో కొత్త పాలక మండలిని జనవరిలో నియమించే అవకాశం ఉందని భావిస్తున్నారు. TUDA చైర్మన్ పాలక మండలిలో ఎక్స్ అఫీషియల్ సభ్యుడిగా కొనసాగుతున్నారు. అయితే ప్రస్తుత స్పెసిఫైడ్ అథారిటీలో ఆయనకు చోటు కల్పించలేదు.

1933లో బ్రిటిష్ ప్రభుత్వం తిరుమల తిరుపతి దేవస్థానాన్ని ఏర్పాటు చేసింది. అప్పుడు అధికారులతో పాటు పాలక మండలిని కూడా ఏర్పాటు చేశారు. 1933 నుంచి 1951 వరకు తొమ్మిది మంది కమిషనర్లు పరిపాలన చేశారు. ఆ తర్వాత కార్యదర్శుల పరిపాలన కొనసాగింది. ఇప్పటివరకు 30 మంది TTD ఈఓలుగా బాధ్యతలు నిర్వహించారు. ప్రస్తుత ఈఓ రవిచంద్ర 30వ ఈఓ కాగా, స్పెసిఫైడ్ అథారిటీ చైర్మన్‌గా 55వ చైర్మన్ అవుతున్నారు.