కరీంనగర్‌లో బీజేపీ-బీఆర్ఎస్ మధ్య ఉద్రిక్తత: కార్పొరేటర్ వ్యాఖ్యలతో ఘర్షణ వాతావరణం

కరీంనగర్ ఎమ్మెల్యే గంగుల కమలాకర్ పై బీజేపీ కార్పొరేటర్ బండారి వేణు చేసిన వ్యాఖ్యలతో నగరంలో ఉద్రిక్తత నెలకొంది.

బండారి వేణు కుటుంబానికి సంబంధించిన ఆడియో సోషల్ మీడియాలో వైరల్ కావడంతో, ఆయన ఎమ్మెల్యే గంగుల కమలాకర్‌ను పరుష పదజాలంతో విమర్శిస్తూ వీడియో విడుదల చేశారు. ఈ వ్యాఖ్యలపై ఆగ్రహం వ్యక్తం చేస్తూ బీఆర్ఎస్ కార్యకర్తలు ఎమ్మెల్యే క్యాంపు కార్యాలయం వద్దకు చేరుకున్నారు. బీజేపీ కార్యాలయం, వేణు ఇంటిపై దాడికి ప్రయత్నించిన బీఆర్ఎస్ కార్యకర్తలను పోలీసులు అడ్డుకున్నారు.

పరిస్థితిని అదుపులోకి తీసుకువచ్చేందుకు పోలీసులు భారీ బందోబస్తు నిర్వహించారు. కొంతమంది బీఆర్ఎస్ కార్యకర్తలను అరెస్టు చేసి పోలీస్ స్టేషన్‌కు తరలించగా, పోలీసుల మధ్య వాగ్వాదం జరిగింది. బండారి వేణు గతంలో గంగుల కమలాకర్ సన్నిహితుడిగా బీఆర్ఎస్‌లో ఉండి, తర్వాత బీజేపీలో చేరారు.

ప్రస్తుతం పోలీసులు బండారి వేణును అదుపులోకి తీసుకున్నట్లు సమాచారం. ఎమ్మెల్యే క్యాంపు కార్యాలయం వద్ద బందోబస్తు కొనసాగుతోంది.