ఉరవకొండలో ఉద్రిక్తత: వైసీపీ నిరసనకు అనుమతి నిరాకరించిన పోలీసులు; నేతలు అదుపులో

అనంతపురం జిల్లా ఉరవకొండలో నేడు ఉద్రిక్తత నెలకొంది. టీడీపీ నేతల దౌర్జన్యాలు, భూ ఆక్రమణలకు వ్యతిరేకంగా వైసీపీ నిరసన ధర్నాకు పిలుపునిచ్చింది. కానీ పోలీసులు ధర్నాకు అనుమతి నిరాకరించారు.

వైసీపీ మాజీ ఎమ్మెల్యే విశ్వేశ్వర్ రెడ్డి తహశీల్దార్ కార్యాలయం ఎదుట ధర్నా చేపట్టనున్నారు. నిరసనకు హాజరు కావడానికి వెళ్తున్న మాజీ ఎంపీ గోరంట్ల మాధవను పోలీసులు అదుపులోకి తీసుకున్నారు. పెనుకొండలో మాజీ మంత్రి శంకర్ నారాయణను గృహ నిర్బంధంలో ఉంచారు. గుంతకల్ సబ్ డివిజన్ పరిధిలోని అన్ని మండలాల్లో సెక్షన్ 30 పోలీస్ యాక్ట్ అమలు చేశారు.

ఇదిలాఉండగా, 2019-24 మధ్య వైసీపీ ప్రభుత్వ హయాంలో బీసీలపై దాడులు జరిగాయని ఆరోపిస్తూ టీడీపీ కూడా నిరసనకు సిద్ధమైంది. మరోవైపు, స్థానిక పాండురంగస్వామి ఆలయ భూమిని వైసీపీ శ్రేణులు ఆక్రమించారనే ఆరోపణతో బీజేపీ మద్దతు ఉన్న ఆలయ పరిరక్షణ సమితి నిరసన చేపట్టాలని భావించింది. మూడు పార్టీల నిరసనలకు పోలీసులు అనుమతి నిరాకరించారు.

శాంతి భద్రతలు, భూ ఆక్రమణ విషయం హైకోర్టు పరిధిలో ఉండటం, ప్రజలకు ఇబ్బంది కలగకుండా ఉండేందుకు ఎవరికీ అనుమతి ఇవ్వలేదని పోలీసులు స్పష్టం చేశారు. ప్రస్తుతం విశ్వేశ్వర్ రెడ్డి పార్టీ కార్యాలయం నుంచి బయలుదేరనున్న నేపథ్యంలో పోలీసులు భారీగా మోహరించారు.

మాజీ ఎంపీ గోరంట్ల మాధవ, మాజీ మంత్రి శంకర్ నారాయణ ఇప్పటికే అదుపులో ఉన్నారు. విశ్వేశ్వర్ రెడ్డి ధర్నాకు బయలుదేరినట్లు వీడియో విడుదల చేశారు, ఏ పరిస్థితుల్లోనైనా నిరసన జరుపుతామని పేర్కొన్నారు. పోలీసులు ఆయన్ను అడ్డుకుంటారా లేదా అనేది చూడాల్సి ఉంది.