హైదరాబాద్ క్యూర్ ప్రాంతంలో 703 చెరువుల పునరుద్ధరణకు తెలంగాణ ప్రభుత్వం ప్రణాళిక

తెలంగాణ ప్రభుత్వం హైదరాబాద్ కోర్ అర్బన్ ఎకనామిక్ రీజియన్ (CUER) పరిధిలోని 703 చెరువులను పునరుద్ధరించాలని నిర్ణయించింది. వరద ముప్పు తగ్గించడం, భూగర్భ జలాలు పెంచడం, తాగునీటి సమస్యలను నివారించడం దీని ఉద్దేశం.

ఈ ప్రణాళిక అమలు కోసం హైడ్రా, ఇరిగేషన్, పొల్యూషన్ కంట్రోల్ బోర్డు, జలమండలి, మూసీ, హెచ్ఎండిఏ, గ్రేటర్ హైదరాబాద్ మున్సిపల్ కార్పొరేషన్ కమిషనర్లతో కమిటీని ఏర్పాటు చేశారు. కమిటీ ఆధ్వర్యంలో ఒక ప్రైవేటు ఏజెన్సీ 20 రోజుల్లో డీటెయిల్డ్ ప్రాజెక్టు రిపోర్టు (డీపీఆర్) సిద్ధం చేయాల్సి ఉంటుంది. ఇందులో చెరువుల మరమ్మతులు, ఖర్చు, నిధుల సమీకరణ, వరద నాలాలు, తూములు, మత్తడి రిపేర్లు వంటి అంశాలు ఉంటాయి.

ఇదిలా ఉండగా, ఎల్నినో ప్రభావంతో రాష్ట్రంలో వర్షాలు తక్కువవడంతో చెరువులు నిండలేదు. దీంతో తాగునీటికి ఇబ్బందులు ఎదురవుతున్నాయి. ఈ నేపథ్యంలో క్యూర్ పరిధిలో నీటి సమస్య ఉండకూడదని ముఖ్యమంత్రి రేవంత్ రెడ్డి ఆదేశించారు. దీనిపై సెక్రటేరియట్లో క్యూర్ స్పెషల్ ఆఫీసర్ ఆధ్వర్యంలో ఉన్నత స్థాయి సమావేశం నిర్వహించారు. ఈ మీటింగులో టూరిజం, ఇరిగేషన్, హైడ్రా, జలమండలి ఉన్నతాధికారులు పాల్గొన్నారు. వారు 703 చెరువుల రిపేర్లు, నీటి నిల్వలు, భవిష్యత్తులో ఇలాంటి విపత్తులపై చర్చించారు.

చెరువులన్నింటినీ ఒకే దశలో పునరుద్ధరించాలని కమిటీ భావిస్తోంది. డీపీఆర్ వచ్చిన వెంటనే ప్రభుత్వానికి నివేదించి, నిధులు కేటాయించాలని అధికారులు యోచిస్తున్నారు.