TG-20 టోర్నీతో జిల్లా క్రికెటర్లకు అవకాశాలు: హెచ్సీఏ కార్యదర్శి జీవన్ రెడ్డి

టీజీ-20 క్రికెట్ టోర్నమెంట్ తెలంగాణలోని మహబూబ్‌నగర్, నిజామాబాద్ వంటి జిల్లాల క్రికెటర్లకు పెద్ద అవకాశాన్ని తీసుకొచ్చింది. జిల్లా స్థాయిలో మౌలిక సదుపాయాలు పెంచడానికి ఇది మంచి వేదికగా మారుతుందని హైదరాబాద్ క్రికెట్ అసోసియేషన్ (హెచ్సీఏ) కార్యదర్శి మన్నె జీవన్ రెడ్డి అన్నారు.

మహబూబ్‌నగర్‌లోని హెచ్సీఏ మైదానానికి పాలమూరు స్ట్రైకర్స్ జట్టు ఐపీఎల్ తరహాలో ప్రత్యేక బస్సులో రాగా, క్రికెట్ అభిమానులు, విద్యార్థులు స్వాగతం పలికారు. ఈ సందర్భంగా జీవన్ రెడ్డి మాట్లాడుతూ, "జిల్లాల్లో దాగున్న ప్రతిభను వెలికి తీసేందుకు ఇది మంచి అవకాశం" అని చెప్పారు.

ఎనిమిది ఫ్రాంచైజీల ద్వారా రూ. 47 కోట్లు సేకరించామని, రూ. 8 కోట్లు స్పాన్సర్‌షిప్ రూపంలో వచ్చాయని ఆయన వెల్లడించారు. "డే వన్ లో ఇంత స్పందన ఊహించలేదు. కానీ మంచి ఫలితం వచ్చింది. ప్రజలు కూడా ప్రోత్సహిస్తున్నారు" అని పేర్కొన్నారు.

"రాబోయే రోజుల్లో రూరల్ ప్రాంతాల నుంచి క్రికెటర్లకు పెద్ద అవకాశం ఇచ్చి, మంచి కోచింగ్ ఇప్పించి, ఐపీఎల్‌లో మన జిల్లాల నుంచి ఇద్దరు-ముగ్గురు ఆడితే అదే సంతృప్తి" అని జీవన్ రెడ్డి అన్నారు. ప్రస్తుతం ఐదు జిల్లాల్లో కొత్త క్రికెట్ గ్రౌండ్ల కోసం భూమి కేటాయింపు జరుగుతోందని, రాబోయే 8 నుంచి 12 నెలల్లో ఐదు కొత్త మైదానాలు అందుబాటులోకి వస్తాయని ఆయన తెలిపారు.