టీజీఎస్ఆర్టీసీ ఖాళీ షాపుల అద్దెకు 694 దుకాణాలకు త్వరలో టెండర్లు

తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) తన అధీనంలో ఉన్న ఖాళీ కమర్షియల్ కాంప్లెక్స్‌లు, షాపులను అద్దెకు ఇవ్వాలని నిర్ణయించింది. రాష్ట్రవ్యాప్తంగా బస్ స్టాండ్లు, డిపోల పరిసరాల్లో ఖాళీగా ఉన్న 694 షాపులకు త్వరలో టెండర్లు పిలవనున్నట్లు అధికారులు తెలిపారు.

ఈ షాపులు హోటళ్లు, ఫుడ్ కోర్టులు, సూపర్ మార్కెట్లు, బ్రాండెడ్ షోరూములు, చిన్న తరహా వ్యాపారాల వరకు అన్నిటికీ అనువుగా ఉంటాయని సంస్థ పేర్కొంది. ఈ నిర్ణయం వల్ల సంస్థకు అదనపు ఆదాయంతో పాటు స్థానిక నిరుద్యోగ యువతకు ఉపాధి అవకాశాలు లభిస్తాయని యాజమాన్యం తెలిపింది.

లీజు కేటాయింపు పూర్తిగా ఆన్‌లైన్ ద్వారా పారదర్శకంగా జరుగుతుందని, దళారుల ప్రమేయం ఉండదని సంస్థ స్పష్టం చేసింది. షాపుల వివరాలు, లీజు సమాచారం, టెండర్ వివరాలను అధికారిక వెబ్‌సైట్‌లో అందుబాటులో ఉంచినట్లు చెప్పారు. వ్యాపారులు ఎలాంటి ఇబ్బందులు లేకుండా ఈ అవకాశాన్ని వినియోగించుకోవచ్చని సంస్థ ఎండీ వై. నాగిరెడ్డి తెలిపారు.