రాజస్థాన్‌లో విచిత్రం: దొంగతనానికి ముందు ఆమ్లెట్ వండుకుని తిన్న దొంగలు

రాజస్థాన్ లోని జులావాడ్ జిల్లాలో ఒక విచిత్రమైన చోరీ జరిగింది. ఇంట్లోకి చొరబడిన దొంగలు ముందుగా వంటగదిలోకి వెళ్లి ఆమ్లెట్లు తయారు చేసుకుని తిన్నారు. ఆ తర్వాత బంగారు ఆభరణాలు, నగదు, ఖరీదైన టెలివిజన్‌ను దొంగిలించి పారిపోయారు. ఈ ఘటన సోషల్ మీడియాలో వైరల్‌గా మారింది.

ఇంటి యజమాని హర్జిత్ సింగ్ క్యాన్సర్ చికిత్స కోసం కుటుంబంతో కలిసి ముంబై వెళ్లారు. ఇల్లు ఖాళీగా ఉండటాన్ని గమనించిన దొంగలు అర్ధరాత్రి తాళాలు పగలగొట్టి లోపలికి ప్రవేశించారు. తొందరపడకుండా ముందుగా కిచెన్‌లోకి వెళ్లి డజన్ పైగా గుడ్లతో ఆమ్లెట్లు చేసుకుని హాయిగా తిన్నారు.

మరుసటి రోజు ఉదయం స్థానికులు తాళాలు పగిలి ఉండటం చూసి పోలీసులను సంప్రదించారు. పోలీసులు ఇంటిని పరిశీలించగా కిచెన్‌లో వాడిన పాత్రలు, గుడ్ల పెంకులు కనిపించాయి. దొంగలు ఇంట్లోనే వంట చేసుకున్నట్లు నిర్ధారించారు. ఫింగర్ ప్రింట్లు, పరిసర సీసీటీవీ ఫుటేజీల ఆధారంగా దర్యాప్తు మొదలుపెట్టారు.

నిందితుల కోసం ప్రత్యేక బృందాలు గాలింపు చేపట్టాయి. ఇంటి యజమానులు రోజుల తరబడి తిరిగి రారని దొంగలకు ముందే తెలిసి ఉండచ్చని పోలీసులు అనుమానిస్తున్నారు. ఈ సంఘటనపై నెటిజన్లు సరదాగా స్పందిస్తున్నారు.