తొలి ఏకాదశి సందర్భంగా ఆలయాల్లో భక్తుల రద్దీ; ప్రత్యేక పూజలు

తొలి ఏకాదశి సందర్భంగా ఆదివారం తెలంగాణలోని పలు ఆలయాల్లో భక్తుల రద్దీ కనిపించింది. హైదరాబాద్లోని బంజారాహిల్స్ వేంకటేశ్వర స్వామి ఆలయం, పూరీ జగన్నాథ ఆలయంతో పాటు పలు ప్రాంతాల్లో భక్తులు తరలివచ్చారు.

ఉదయం నుంచే క్యూలైన్లలో నిలబడి భక్తులు స్వామి దర్శనం చేసుకున్నారు. చాలా మంది భక్తులు ఉపవాసం ఉండగా, మరికొందరు నదుల్లో పుణ్యస్నానాలు ఆచరించారు. కొందరు భక్తులు తమ ఇంటి సంప్రదాయాల ప్రకారం బొబ్బట్లు, పులిహార వంటి నైవేద్యాలు స్వామికి సమర్పించి ప్రసాదంగా పంచారు.

వరంగల్లోని భద్రకాళీ అమ్మవారి ఆలయంలోనూ పెద్ద సంఖ్యలో భక్తులు దర్శనం చేసుకున్నారు. అక్కడి వెయ్యి స్తంభాల గుడిలో నూరు కుండలతో స్వామికి శతకటాభిషేకం నిర్వహించారు. వర్షాలు కురిపించాలని కోరుతూ భక్తులు ప్రత్యేక ప్రార్థనలు చేశారు. రేపు రుద్ర పారాయణం, రుద్ర హోమం, వరుణ హోమం కూడా నిర్వహించనున్నట్లు ఆలయ వర్గాలు తెలిపాయి.

తొలి ఏకాదశి రోజున ఉపవాసం ఉంటే ఏడాది మొత్తం ఉపవాసం చేసినంత ఫలితం లభిస్తుందన్న నమ్మకంతో పలువురు ఉపవాసం ఉన్నారు. ఈ పర్వదినాన్ని పురస్కరించుకుని రాష్ట్రవ్యాప్తంగా ఆలయాల్లో భజనలు, ప్రత్యేక పూజలు నిర్వహించారు.