విశాఖలో బస్సు లారీ ఢీకొని ముగ్గురు మృతి, తొమ్మిది మందికి గాయాలు

విశాఖపట్నం జిల్లా గాజువాక సమీపంలో జాతీయ రహదారిపై బుధవారం తెల్లవారుజామున 4 గంటలకు ప్రమాదం జరిగింది. రాజమండ్రి నుంచి పార్వతీపురం వెళ్తున్న APSRTC సూపర్ లగ్జరీ బస్సు ఆగి ఉన్న లారీని ఢీకొట్టింది. ఈ ప్రమాదంలో ముగ్గురు మృతి చెందగా, తొమ్మిది మంది తీవ్రంగా గాయపడ్డారు.

బొగ్గు తీసుకెళ్తున్న లారీ టైర్ పంక్చర్ కావడంతో గాజువాక శ్రీనగర్ వద్ద హైవేపై ఆగి ఉంది. APSRTC బస్సు అతివేగంగా వచ్చి ఆ లారీని వెనుక నుంచి ఢీకొట్టింది. ఈ ఘటనలో బస్సు డ్రైవర్, ఇద్దరు మహిళా ప్రయాణికులు అక్కడికక్కడే మృతి చెందారు.

గాయపడిన తొమ్మిది మందిని కింగ్ జార్జి హాస్పిటల్ (KGH) కు తరలించి చికిత్స అందిస్తున్నారు. వారి పరిస్థితి నిలకడగా ఉన్నట్లు వైద్యులు తెలిపారు. ప్రమాద తీవ్రతకు బస్సు ఒకవైపు పూర్తిగా ధ్వంసమైంది.

ఆసుపత్రిలో బాధితులను రాష్ట్ర రవాణా శాఖ మంత్రి మండిపల్లి రాంప్రసాద్ రెడ్డి పరామర్శించారు. మృతుల కుటుంబాలకు ప్రభుత్వం తరపున రూ.5 లక్షల ఎక్స్గ్రేషియా ప్రకటించారు. గాయపడిన వారి చికిత్స ఖర్చులు మొత్తం ప్రభుత్వం భరిస్తుందని భరోసా ఇచ్చారు. అలాగే, ఈ ఘటనపై దర్యాప్తు చేసి నివేదిక ఇవ్వాలని అధికారులను ఆదేశించారు.

ఈ ప్రమాదంపై మంత్రులు అనిత, డోలా శ్రీ బాల వీరాంజనేయ స్వామి, ఆర్టీసి చైర్మన్ కొనగల్ల నారాయణ విచారం వ్యక్తం చేశారు. ఆర్టీసి సిబ్బంది ఘటనా స్థలానికి చేరుకుని సహాయక చర్యలు చేపట్టారు.