కడప-చెన్నై రహదారిపై మూడు వాహనాలు అగ్నికి ఆహుతి

YSR కడప జిల్లా రైల్వే కోడూరు మండలం బాలపల్లె చెక్పోస్ట్ సమీపంలో మంగళవారం ఉదయం మూడు వాహనాలు అగ్నిప్రమాదంలో పూర్తిగా కాలిపోయాయి. ఒక లారీ, రెండు కార్లు నాశనమయ్యాయి. ప్రాణనష్టం లేదు.

ప్రొద్దుటూరుకు చెందిన నలుగురు కుటుంబ సభ్యులు కారులో తిరుపతికి వెళ్తున్నారు. వారి కారు నియంత్రణ తప్పి రోడ్డు పక్కన నిలిపి ఉన్న లారీని వెనకనుంచి డీకొట్టింది. ముగ్గురికి స్వల్ప గాయాలయ్యాయి. వారు తిరుపతిలోని ఒక ప్రైవేట్ ఆసుపత్రికి వెళ్లారు.

ఉదయం 10 నుంచి 11 గంటల మధ్య కడప నుంచి తిరుపతి వైపు వెళ్తున్న మరో కారు అదే స్థలానికి వచ్చింది. ఆ కారు నుంచి పొగలు రావడం గమనించిన driver అప్రమత్తమై వాహనం ఆపాడు. ప్రయాణికులు బయటకు వచ్చిన తర్వాత ఆ కారుకు మంటలు చెలరేగాయి. ఆ మంటలు లారీకి, మొదటి కారుకు కూడా వ్యాపించాయి.

సమాచారం అందుకున్న అగ్నిమాపక అధికారి విజయ్ కుమార్ సిబ్బందితో ఘటనాస్థలానికి చేరుకున్నారు. అగ్నిమాపక సిబ్బంది మంటలను అదుపులోకి తెచ్చారు. అప్పటికే మూడు వాహనాలు పూర్తిగా కాలిపోయాయి.