నిజామాబాద్‌లో శ్రీరామసాగర్ ప్రాజెక్టులో ఈతకు వెళ్లి ముగ్గురు యువకులు మృతి, ఒకరు గల్లంతు

నిజామాబాద్ జిల్లాలోని శ్రీరామసాగర్ ప్రాజెక్టు వద్ద ఈతకు వెళ్లిన నలుగురు యువకులు ప్రమాదానికి గురయ్యారు. ఈ ఘటనలో ముగ్గురు మృతి చెందగా, మరొకరు గల్లంతయ్యారు.

నిజామాబాద్ నగరానికి చెందిన ముగ్గురు, మహారాష్ట్రకు చెందిన ఒకరు విహారం కోసం శ్రీరామసాగర్‌కు వెళ్లారు. ప్రాజెక్టులో ఈత కొట్టేందుకు దిగిన వారు ఒక్కసారిగా నీట మునిగారు.

సమాచారం అందుకున్న పోలీసులు ఘటనా స్థలానికి చేరుకున్నారు. స్థానికులు, ఎన్డీఆర్ఎఫ్ సిబ్బంది సహాయంతో సహాయక చర్యలు చేపట్టారు. గాలింపులో ముగ్గురి మృతదేహాలు లభ్యమయ్యాయి.

చీకటి పడటంతో సహాయక చర్యలు నిలిపివేసినట్లు సీపీ సాయి చైతన్య తెలిపారు. ప్రాజెక్టులు, కాలువలు, చెరువుల వద్దకు వెళ్లే పర్యాటకులు జాగ్రత్తగా ఉండాలని ఆయన సూచించారు.