పోలవరంలో పులి భయం: పవన్ కల్యాణ్ ఆదేశాలతో అటవీశాఖ ‘హనుమాన్’ ఆపరేషన్

పోలవరం జిల్లా దేవీపట్నం గ్రామంలో పులి సంచారం ప్రజల్లో భయాందోళనలు రేపుతోంది. గ్రామస్థులు, అటవీ శాఖ అధికారులు అప్రమత్తంగా ఉన్నారు. డిప్యూటీ సీఎం పవన్ కల్యాణ్ సత్వర చర్యలు చేపట్టాలని ఆదేశించారు. దీంతో అటవీ శాఖ ‘హనుమాన్’ పేరుతో ప్రత్యేక ఆపరేషన్ చేపట్టి 200 మందికి పైగా సిబ్బందిని మోహరించింది. పులిని పట్టుకునేందుకు నాలుగు బృందాలు ఏర్పాటు చేసి, గంగంపాలెం వద్ద నాలుగు వేర్వేరు చోట్ల ఆవులను ఎరగా వేసి పులి కోసం గాలిస్తున్నారు. బెంగళూరు నుంచి నిపుణుల బృందం రంపచోడవరం చేరుకుంది. జిల్లా వ్యాప్తంగా అటవీ సిబ్బందిని అప్రమత్తం చేసి, డ్రోన్ కెమెరాలతో పులి కదలికలను ఎప్పటికప్పుడు పర్యవేక్షిస్తున్నారు. డీఎఫ్ఓ రామచంద్రరావు మాట్లాడుతూ, డ్రోన్ సాయంతో పులి కదలికలు గుర్తిస్తున్నామని తెలిపారు.