ఏలూరు జిల్లాలో పెద్దపులి కోసం ముమ్మర గాలింపు; నిపుణుల బృందాలు రంగంలోకి

ఏలూరు జిల్లా పాపికొండల నేషనల్ పార్క్ పరిసర ప్రాంతాల్లో ఓ పెద్దపులి సంచరిస్తూ పశువులపై దాడి చేస్తోంది. స్థానికుల ప్రకారం, ఈ పులి ఇప్పటివరకు వందల సంఖ్యలో పశువులను చంపింది. పోలవరం, కొయ్యలగూడెం, గోపాలపురం, బుట్టాయిగూడెం తదితర మండలాల్లో ప్రజలు తీవ్ర భయాందోళనకు గురవుతున్నారు.

పులిని సురక్షితంగా బంధించేందుకు అటవీశాఖ అధికారులు మెగా ఆపరేషన్ చేపట్టారు. మహారాష్ట్ర, బెంగళూరు నుంచి వైల్డ్ లైఫ్ ఎస్ఓఎస్, పీపుల్స్ ఫర్ ఎనిమల్స్ సంస్థలకు చెందిన ఆరుగురు అనుభవజ్ఞులైన మత్తుమందు తుపాకీ నిపుణులను రంగంలోకి దించారు. పులికి ఇప్పటికే అమర్చిన రేడియో కాలర్ ట్రాకర్ సహాయంతో దాని కదలికలను నిరంతరం పర్యవేక్షిస్తున్నారు. డ్రోన్ల ద్వారా నిఘా పెట్టినా పులి మాత్రం చాకచక్యంగా తప్పించుకుపోతోంది.

గతంలో ఈ పులిని ఒకసారి పట్టుకుని రేడియో కాలర్ బిగించి అభయారణ్యంలోకి వదిలిపెట్టారు. తాజాగా మళ్లీ జనావాసాల్లోకి వచ్చి దాడులు చేస్తోంది. అధికారులు ఏర్పాటు చేసిన ప్రత్యేక మంచెల జోలికి రాకుండా, తెలివిగా తప్పించుకుంటూ వారికి సవాల్‌గా మారింది.

సరిహద్దు గ్రామాల్లో ప్రజలను డప్పు చాటింపులు, మైకు ప్రకటనల ద్వారా అప్రమత్తం చేస్తున్నారు. ఈ ఘటన కారణంగా పాపికొండలకు పర్యాటకుల రాక కూడా తగ్గింది. పులిని పట్టుకునేందుకు రాత్రింబవళ్లు ప్రయత్నాలు కొనసాగుతున్నాయి.