ఏలూరు జిల్లాలో పెద్దపులి సంచారం; పశువులపై దాడి, అటవీ శాఖ ఆపరేషన్

ఏలూరు జిల్లాలోని బుట్టాయిగూడెం మండలం గౌరంపేటలో బెంగాల్ టైగర్ సంచరిస్తూ పశువులపై దాడి చేసింది. నిన్న మూడు పశువులను, చిన్న కామవరం సమీపంలో రెండు పశువులను చంపింది. ఈ ఘటనలతో గ్రామస్తులు తీవ్ర భయంతో ఉన్నారు.

అటవీ శాఖ అధికారులు రేడియో కాలర్ సిగ్నల్ ద్వారా పులిని ట్రాక్ చేస్తున్నారు. పూణే, బెంగళూరు, వివిధ టైగర్ రిజర్వ్ల నుంచి ప్రత్యేక బృందాలు, ఆరుగురు మత్తుమందు తుపాకీలతో షూటర్స్‌ను రంగంలోకి దింపారు. ఏలూరు జిల్లా అటవీ శాఖాధికారి పి.వి. సందీప్ రెడ్డి ఆపరేషన్‌ను పర్యవేక్షిస్తున్నారు.

దర్భగూడెం, రాజవరం, చెల్లావారిగూడెం తదితర గ్రామాల్లో మైక్ ద్వారా ప్రజలను అప్రమత్తం చేస్తున్నారు. గుబ్బల మంగమ్మ ఆలయానికి భక్తుల సంఖ్య తగ్గింది. పులిని సురక్షితంగా బంధించే వరకు గ్రామస్తులు జాగ్రత్తగా ఉండాలని అధికారులు సూచించారు.