ఏలూరు జిల్లాలో పులి సంచారం: దర్భగూడెం అటవీ ప్రాంతంలో భారీ ఆపరేషన్; ప్రజలకు అలర్ట్

ఏలూరు జిల్లాలో పులి సంచారం అటవీ శాఖను అప్రమత్తం చేసింది. జిలుగుమిల్లి మండలం దర్భగూడెం అటవీ ప్రాంతంలో పులి కదలికలు గమనించి, రాష్ట్ర అటవీ శాఖ భారీ ఆపరేషన్ ప్రారంభించింది. ఏలూరు, రాజమండ్రి, కాకినాడ, చింతూరు, పాపికొండ నేషనల్ పార్క్ పరిధిలో పులి సంచరిస్తున్నట్లు అధికారులు గుర్తించారు.

పులిని సురక్షితంగా బంధించేందుకు మహారాష్ట్రలోని వార్ధా, పూణే నుండి ప్రత్యేక బృందాల్ని, బెంగళూరు నుండి వైల్డ్ లైఫ్ నిపుణుల్ని, పీపుల్ ఫర్ యానిమల్స్ ప్రతినిధుల్ని రంగంలోకి దించారు. జిల్లా అటవీ శాఖాధికారి పి.వి. సందీప్ రెడ్డి మాట్లాడుతూ, మత్తుమందు తుపాకీలతో పులిని బంధించడంలో నైపుణ్యం ఉన్న ఆరు ట్రాకింగ్ షూటర్లు సిద్ధంగా ఉన్నారని తెలిపారు.

ఆపరేషన్లో అత్యాధునిక సాంకేతిక పరిజ్ఞానం వినియోగిస్తున్నారు. థర్మల్ డ్రోన్లు, నైట్ విజన్ కెమెరాలు, కెమెరా ట్రాప్‌లు, పాదముద్రికల ఆధారంగా పులి కదలికలను ట్రాక్ చేస్తున్నారు. పులి అత్యంత చురుగ్గా, తెలివిగా మానవ సంచారం ఉన్న ప్రాంతాలను తప్పించుకుంటూ మార్గం మార్చుకుంటున్నప్పటికీ, అన్ని వైపుల నిప్పుల బృందాలు మోహరించి, పులి వెళ్లే అవకాశమున్న దారులను కవర్ చేస్తున్నారు.

పులి సంచారం కారణంగా దర్భగూడెం, పి. రాజవరం, చల్లావారి గూడెం, అప్పలరాజు గూడెం, సిరివారి గూడెం, రామన్నపాలెం, మడకవారి గూడెం, శ్రీరత్న గూడెం, సీతంపేట తదితర గ్రామాల ప్రజలను డప్పు చాటింపులు, మైక్ ప్రకటనల ద్వారా అప్రమత్తం చేస్తున్నారు. కన్నాపురం, పోలవరం, కోకునూరు, జంగారెడ్డి గూడెం ప్రాంతాల్లో అటవీ శాఖ అధికారులు పూర్తి స్థాయి అప్రమత్తతతో పనిచేస్తున్నారు. ప్రజలు భయపడకుండా అటవీ శాఖ సూచనలు పాటించాలని, సహకరించాలని జిల్లా అటవీ శాఖాధికారి విజ్ఞప్తి చేశారు.