తిరుమలలో భక్తుల రద్దీ.. సర్వదర్శనానికి 20 గంటల సమయం, హుండీ ఆదాయం ₹3.81 కోట్లు

తిరుమలలో భక్తుల రద్దీ పెరిగింది. టోకెన్లు లేని భక్తులకు శ్రీవారి సర్వదర్శనానికి సుమారు 20 గంటల సమయం పడుతోంది.

నిన్న 90,293 మంది భక్తులు శ్రీవారిని దర్శించుకున్నారు. 53,090 మంది భక్తులు తలనీలాలు సమర్పించి మొక్కులు తీర్చుకున్నారు. శ్రీవారి హుండీ ద్వారా నిన్న ₹3.81 కోట్ల ఆదాయం వచ్చినట్లు TTD తెలిపింది.

వారాంతపు రోజులు, స్వాతంత్ర దినోత్సవ సెలవు కారణంగా భక్తులు అధిక సంఖ్యలో వస్తున్నారు. ఆంధ్రప్రదేశ్, తెలంగాణతో పాటు తమిళనాడు, కర్ణాటక నుంచి కూడా భక్తులు తరలివస్తున్నట్లు TTD అంచనా వేసింది.

రద్దీ నేపథ్యంలో TTD సిబ్బంది సెలవులు రద్దు చేశారు. VIP ప్రోటోకాల్ పరిధిలో ఉన్నవారికి మాత్రమే అవకాశం కల్పిస్తున్నారు. సిఫారసు లేఖలను కూడా రద్దు చేశారు. మధ్యాహ్నం 12 నుంచి సాయంత్రం 4 గంటల వరకు క్యూ లైన్ల వద్ద మంచినీరు, అన్నప్రసాదాలు సరఫరా చేస్తున్నారు.

గదులు, కాటేజీలు దొరకడం లేదు. గదుల కోసం 5 నుంచి 6 గంటలు, తలనీలాల కోసం 2 నుంచి 3 గంటలు వేచి ఉండాల్సి వస్తోంది. కాలిబాట మార్గంలో నిన్న 40 వేల నుంచి 50 వేల మంది వచ్చారు. వారికి TTD దర్శనం ఏర్పాటు చేసింది.

TTD అదనపు EO వెంకయ్య చౌదరి, అధికారులు క్యూ లైన్లను పర్యవేక్షిస్తున్నారు. భక్తులు తోపులాటకు దిగవద్దని, ముందు వచ్చినవారికే ముందు దర్శనం ఉంటుందని TTD విజ్ఞప్తి చేసింది. రద్దీ మరో రెండు రోజులు కొనసాగే అవకాశం ఉందని అధికారులు తెలిపారు.