తిరుమలలో భక్తుల రద్దీ మళ్లీ పెరిగింది; సర్వదర్శనానికి 15 గంటల సమయం

తిరుమల శ్రీ వేంకటేశ్వర స్వామి ఆలయంలో భక్తుల రద్దీ మళ్లీ పెరిగింది. గత కొన్ని రోజులు సాధారణంగా ఉన్న రద్దీ బుధ, గురువారాల్లో ఒక్కసారిగా పెరిగింది. వైకుంఠం క్యూ కాంప్లెక్స్‌లోని 31 కంపార్ట్‌మెంట్లు భక్తులతో నిండిపోయాయి. బుధవారం 84,220 మంది భక్తులు స్వామివారిని దర్శించుకున్నారు. అయినా క్యూ లైన్లలో రద్దీ తగ్గలేదు.

గురువారం స్వామివారికి ప్రత్యేక కైంకర్యాలు ఉండడంతో దర్శన సమయం తగ్గింది. దాంతో గురువారం ఉదయం నుంచి ఏర్పడిన రద్దీ ఆదివారం రాత్రి వరకు కొనసాగే అవకాశం ఉందని టీటీడీ అధికారులు అంచనా వేశారు.

టీటీడీ ప్రకటించిన వివరాల ప్రకారం, టోకెన్లు లేని భక్తులకు సర్వదర్శనానికి 15 గంటల సమయం పడుతోంది. ప్రత్యేక ప్రవేశ దర్శనానికి 4 గంటలు, సర్వదర్శనం టోకెన్ పొందిన భక్తులకు 6 గంటల సమయం పడుతుందని టీటీడీ తెలిపింది. భక్తులు తదనుగుణంగా తమ దర్శనాన్ని ప్లాన్ చేసుకోవాలని అధికారులు సూచించారు.