తిరుమలలో భక్తుల రద్దీ: 20 గంటల పాటు వేచి ఉండాల్సిన పరిస్థితి

తిరుమల శ్రీవారి దర్శనం కోసం భక్తుల రద్దీ విపరీతంగా కొనసాగుతోంది. వారాంతం కావడంతో వివిధ ప్రాంతాల నుంచి పెద్ద సంఖ్యలో భక్తులు వస్తున్నారు. దీంతో క్యూ లైన్లు ఆలయం వెనుక ఉన్న శిలాతోరణం వరకు విస్తరించాయి.

సర్వదర్శనం కోసం భక్తులు సుమారు 20 గంటల పాటు వేచి ఉండాల్సి వస్తోంది. దాదాపు 2-3 కిలోమీటర్ల మేర క్యూ లైన్లు కొనసాగుతున్నాయి. నిన్న ఒక్క రోజే 90 వేల మంది భక్తులు స్వామివారిని దర్శించుకున్నారు.

భక్తుల రద్దీని దృష్టిలో ఉంచుకొని టిటిడి అధికారులు ఏర్పాట్లను పర్యవేక్షిస్తున్నారు. వీఐపీ బ్రేక్ దర్శనాలను ప్రోటోకాల్ పరిధికే పరిమితం చేశారు. సామాన్య భక్తులకు ప్రాధాన్యత ఇచ్చే ఉద్దేశంతో ఈ నిర్ణయం తీసుకున్నారు. రద్దీ పెరుగుతుండటంతో తిరుపతిలో సర్వదర్శనం టోకెన్లను టిటిడి తాత్కాలికంగా నిలిపివేసింది.

నిన్న ఒక్క రోజే శ్రీవారి హుండీ ఆదాయం 3.78 కోట్లు వచ్చిందని టిటిడి వెల్లడించింది. భక్తుల అవసరాల కోసం 4 లక్షల లడ్డూలను సిద్ధం చేశారు. ఈ వారాంతంలో రద్దీ కొనసాగుతుందని, భక్తులు వారాంతపు రోజుల్లో కాకుండా ఇతర రోజుల్లో దర్శనానికి రావాలని టిటిడి విజ్ఞప్తి చేసింది.