తిరుమల శ్రీవారి దర్శనం – 24 గంటల వేచి ఉండాలంటున్న టీటీడీ; హుండీ ఆదాయం రూ.4.86 కోట్లు

తిరుమల శ్రీ వెంకటేశ్వర స్వామి ఆలయం భక్తులతో కిటకిటలాడుతోంది. వైకుంఠం క్యూ కాంప్లెక్స్ లోని 31 కంపార్ట్మెంట్లు పూర్తిగా నిండాయి. భక్తుల క్యూ లైన్లు క్యూ కాంప్లెక్స్ బయట శిలాతోరణం వరకు కొనసాగుతున్నాయి.

ఈ నేపథ్యంలో టీటీడీ అధికారులు దర్శనం వేచే సమయాన్ని ప్రకటించారు. టోకెన్లు లేని భక్తులకు సర్వదర్శనానికి 24 గంటల సమయం పడుతుంది. రూ.300 ప్రత్యేక ప్రవేశ దర్శనం టికెట్లు ఉన్నవారికి 6 గంటలు, సర్వదర్శనం టికెట్లు ఉన్నవారికి 8 గంటల సమయం పడుతుందని చెప్పారు.

రోజువారీగా సగటున 75 వేల మంది భక్తులు స్వామి దర్శనం చేసుకుంటున్నారు. మంగళవారం 81 వేల మంది దర్శించగా, హుండీ ద్వారా రూ.4.86 కోట్ల ఆదాయం వచ్చింది. గురు, శుక్రవారాల్లో కూడా ఇదే స్థాయిలో దర్శనం కల్పించేలా ఏర్పాట్లు చేస్తున్నామని అధికారులు తెలిపారు.

భక్తుల రద్దీ కారణంగా గురువారం సర్వదర్శన టోకెన్ల జారీని పరిపాలన పరమైన కారణాలతో రద్దు చేశారు. తిరుపతిలోని శ్రీనివాసం, విష్ణు నివాసం, భూదేవి కాంప్లెక్స్ వద్ద ఎస్ఎస్డీ టోకెన్లు ఇస్తుండేవారు. గురువారం స్వామి వారికి ప్రత్యేక సేవలు ఉండటం కూడా టోకెన్ల రద్దుకు కారణమని టీటీడీ పేర్కొంది.