తిరుమలలో భక్తుల రద్దీ కొనసాగుతోంది, సెప్టెంబర్ టికెట్ల షెడ్యూల్ విడుదల

తిరుమలలో భక్తుల రద్దీ ఇంకా కొనసాగుతోంది. వైకుంఠం క్యూ కాంప్లెక్స్ నిండిపోయి క్యూ లైన్లు బయట 2 కిలోమీటర్ల మేర విస్తరించాయి. సోమవారం కూడా అదే రద్దీ కనిపించింది.

టోకెన్ లేని భక్తులకు సర్వదర్శనానికి 24 గంటలు, ప్రత్యేక ప్రవేశ దర్శనానికి 6 గంటలు, సర్వదర్శన టోకెన్ పొందిన వారికి 8 గంటల సమయం పడుతోందని తిరుమల తిరుపతి దేవస్థానం అధికారులు తెలిపారు.

ఇదిలా ఉండగా, సెప్టెంబర్ నెలకు సంబంధించిన ఆర్జిత సేవ టికెట్లను జూన్ 18న ఉదయం 10 గంటలకు ఆన్‌లైన్‌లో విడుదల చేస్తారు. ఎలక్ట్రానిక్ డిప్ పేరు నమోదు జూన్ 20 ఉదయం 10 గంటల వరకు కొనసాగుతుంది. నగదు చెల్లింపుకు జూన్ 20 నుంచి 22 మధ్యాహ్నం 12 గంటల వరకు అవకాశం ఉంది.

జూన్ 22న ఉదయం 10 గంటలకు కళ్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకర సేవ టికెట్లు ఆన్‌లైన్‌లో విడుదల చేస్తారు. అదే రోజు మధ్యాహ్నం వర్చువల్ సేవల దర్శన స్లాట్ల టికెట్లు కూడా రిలీజ్ కానున్నాయి. జూన్ 23న ఉదయం 10 గంటలకు అంగ ప్రదక్షిణ టోకెన్లు, 11 గంటలకు శ్రీవాణి ట్రస్ట్ దర్శన టికెట్లు, మధ్యాహ్నం 3 గంటలకు వృద్ధులు-దివ్యాంగుల ప్రత్యేక దర్శన టోకెన్లు విడుదల చేస్తారు. జూన్ 24న ఉదయం 10 గంటలకు ప్రత్యేక ప్రవేశ దర్శన టికెట్లు, మధ్యాహ్నం వసతి గదుల కోటా విడుదల చేయనున్నారు.