తిరుమల సరిహద్దుల్లో చిరుతల సంచారం – అటవీ శాఖ హెచ్చరిక బోర్డులు

తిరుమల కొండల సరిహద్దు ప్రాంతాల్లో నెల రోజుల్లోనే నాలుగు సార్లు చిరుతలు రోడ్లపై కనిపించాయి. దీంతో స్థానికులు తీవ్ర భయాందోళనకు గురయ్యారు.

అప్రమత్తమైన అటవీ శాఖ అధికారులు తిరుపతి శివారు ప్రాంతాల్లో ప్రజలను అలర్ట్ చేశారు. ఉపాధ్యాయ నగర్, ఎస్వీ యూనివర్సిటీ పరిసర ప్రాంతాలతో సహా పలు చోట్ల హెచ్చరిక బోర్డులు ఏర్పాటు చేశారు. ‘మీరు పారవేసే వ్యర్థాల వల్ల వన్యప్రాణులకు హాని కలుగుతుంది. వన్యప్రాణి సంరక్షణలో సహకరించండి’ అని ఆ బోర్డులపై సూచించారు.

స్థానికులు చెప్పిన వివరాల ప్రకారం, నెల క్రితం ఒక చిరుత నీటి కోసం వచ్చింది. మరో చిరుత చాలా సన్నగా, ఆకలితో ఉన్నట్లు కనిపించింది. అటవీ ప్రాంతానికి ఆనుకుని నివాసాలు విస్తరించడంతో చిరుతలు ఆహారం కోసం రోడ్లపైకి వస్తున్నట్లు అధికారులు గుర్తించారు.

రాత్రి 10 గంటల నుంచి ఉదయం 6 గంటల వరకు ప్రజలు ఇళ్ల నుంచి బయటకు రావడం లేదని స్థానికులు తెలిపారు. హోటళ్లలో బస చేసే యాత్రికులు కూడా భయపడుతున్నారు. రోడ్లపై సీసీ కెమెరాలు లేకపోవడం, ఫెన్సింగ్ సౌకర్యం లేకపోవడంతో ఎప్పుడైనా దాడి జరగొచ్చని ఆందోళన వ్యక్తం చేస్తున్నారు.

చిరుతలను బంధించి దట్టమైన అడవుల్లో వదిలేయాలని, బోన్లు ఏర్పాటు చేయాలని స్థానికులు డిమాండ్ చేస్తున్నారు. అటవీ శాఖ అధికారులు చిరుత ఆనవాళ్లను గుర్తించే ప్రయత్నం చేస్తున్నారు. త్వరలో బోన్లు ఏర్పాటు చేస్తామని, ప్రజలు ఆహార పదార్థాలు కాలవల్లో పడేయకుండా సహకరించాలని అధికారులు కోరుతున్నారు.