తిరుమల శ్రీవారి ఆలయంలో మూడు రోజుల పవిత్రోత్సవాలు ప్రారంభం

తిరుమల శ్రీవారి ఆలయంలో మూడు రోజుల పవిత్రోత్సవాలు శాస్త్రోక్తంగా ప్రారంభమయ్యాయి. తొలిరోజు పవిత్ర ప్రతిష్ట కార్యక్రమాన్ని నిర్వహించారు.

ఉదయం శ్రీదేవి భూదేవి సమేత శ్రీ మలయప్ప స్వామి వారిని పవిత్ర మండపంలోని యాగశాలకు వేంచేపు చేశారు. అక్కడ హోమాలు, వైదిక కార్యక్రమాలు జరిగాయి. సంపంగి ప్రాకారంలో స్నపన తిరుమంజనం చేశారు.

పాలు, పెరుగు, తేనె, చందనం, పసుపు వంటి ద్రవ్యాలతో స్వామి అమ్మవార్లకు అభిషేకం చేశారు. వేద పండితులు పంచసూక్తాలు పఠించారు. అనంతరం పవిత్ర ప్రతిష్ట నిర్వహించారు. మధ్యాహ్నం స్వామి అమ్మవార్లకు విశేష సమర్పణ జరిగింది.

సాయంత్రం స్వామివారు ఆలయ నాలుగు మాడ వీధుల్లో విహరించనున్నారు. భక్తులకు దర్శనం ఇవ్వనున్నారు. రాత్రి యాగశాలలో ప్రత్యేక వైదిక కార్యక్రమాలు కొనసాగనున్నాయి.

ఈ ఉత్సవాలు ఏటా మూడు రోజులు జరుగుతాయి. తొలిరోజు పవిత్ర ప్రతిష్ట, రెండో రోజు పవిత్ర సమర్పణ, మూడో రోజు పూర్ణాహుతి జరుగుతుంది. ఆలయ కార్యక్రమాల్లో తెలిసో తెలియకో జరిగే తప్పులకు ప్రాయశ్చిత్తంగా పవిత్రోత్సవాలు నిర్వహిస్తారు.