తిరుమలలో మంత్రి కందుల దుర్గేష్ సహా పలువురి దర్శనం; పవన్ కల్యాణ్ దీక్షకు ప్రత్యేక ప్రార్థనలు

తిరుమల శ్రీ వేంకటేశ్వర ఆలయంలో సోమవారం వీఐపీ విరామ సమయంలో పలువురు ప్రముఖులు స్వామివారిని దర్శించుకున్నారు. ఏపీ మంత్రి కందుల దుర్గేష్, కర్ణాటక బీజేపీ రాష్ట్ర అధ్యక్షుడు విజయేంద్ర, శ్రీలంక మాజీ క్రికెటర్ తిలకన్న వేర్వేరుగా దర్శనంలో పాల్గొన్నారు.

దర్శనం అనంతరం ఆలయంలోని రంగనాయకుల మండపంలో వేద పండితులు ఆశీర్వచనం చేశారు. ఆలయ అధికారులు శ్రీవారి తీర్థ ప్రసాదాలు, పట్టు వస్త్రం ఇచ్చి సత్కరించారు.

మంత్రి కందుల దుర్గేష్ మాట్లాడుతూ, తన నియోజకవర్గం నిడదవోలు నుంచి కుటుంబసభ్యులు, స్థానిక నాయకులతో కలిసి వచ్చినట్లు తెలిపారు. ఉపముఖ్యమంత్రి పవన్ కల్యాణ్ చేపట్టిన చాతుర్మాస దీక్ష నిరంతరాయంగా కొనసాగాలని, అది విజయవంతం కావాలని స్వామివారిని ప్రార్థించామన్నారు.

అదేవిధంగా, ముఖ్యమంత్రి చంద్రబాబు నాయుడు సారధ్యంలో స్వచ్ఛాంధ్ర కార్పొరేషన్ ప్రాజెక్టులు విజయవంతం కావాలని, రాష్ట్రానికి మరిన్ని పెట్టుబడులు, ఉద్యోగాలు రావాలని కూడా ప్రార్థించినట్లు చెప్పారు. ప్రజలంతా సంతోషంగా ఉండాలని, రాష్ట్ర అభివృద్ధి కొనసాగాలని దుర్గేష్ కోరారు.