తిరుపతి: కలుషిత బిర్యానీ ఫ్యాక్టరీని సీజ్ చేసిన ఫుడ్ సేఫ్టీ అధికారులు

తిరుపతిలోని బైరాగపట్ట ఏరియాలో ఉన్న ఓ బిర్యానీ ఫ్యాక్టరీ హోటల్ పై ఫుడ్ సేఫ్టీ అధికారులు ఆకస్మిక తనిఖీలు నిర్వహించారు. కలుషిత బిర్యానీ తిన్న మూడేళ్ల చిన్నారి అస్వస్థతకు గురికావడంతో స్థానికుల నుంచి ఫిర్యాదు వచ్చింది. ఈ నేపథ్యంలో జిల్లా కలెక్టర్, మున్సిపల్ కమీషనర్ ఆదేశాలతో ఫుడ్ సేఫ్టీ ఆఫీసర్, వెటర్నరీ ఆఫీసర్, శానిటరీ సూపర్వైజర్లు సంయుక్తంగా దాడి చేశారు.

దాడిలో చెడిపోయిన చికెన్, చేపలు, పెరుగు, కూరగాయలు నిల్వ ఉన్నట్లు గుర్తించారు. స్టోర్ రూమ్ లో పురుగులు, ఎలుకల విసర్జనలు ఉండడంతో అపరిశుభ్రమైన వాతావరణం కనిపించింది. అన్ని ఆహార పదార్థాలను పరిశుభ్రత ప్రమాణాలకు విరుద్ధంగా నిల్వ ఉంచారు. అంతేకాకుండా, ట్రేడ్ లైసెన్స్, కార్పొరేషన్ అనుమతులు లేకుండానే సంస్థను నిర్వహిస్తున్నట్లు తేలింది. కార్మికులు గ్లౌజులు, హెడ్ క్యాప్ లాంటి ప్రొటెక్టివ్ పరికరాలు ధరించకుండానే వంట చేస్తున్నారు.

ఈ ఉల్లంఘనలతో అధికారులు హోటల్ ను వెంటనే సీజ్ చేశారు. ఆహార నమూనాలను స్వాధీనం చేసుకుని ల్యాబ్ పరీక్షలకు పంపించారు. యాజమాన్యానికి నోటీసులు జారీ చేసి, చట్టపరమైన చర్యలు తీసుకుంటామని హెచ్చరించారు. కలుషిత ఆహారం విక్రయించే వారిపై కఠిన చర్యలు తప్పవని ఫుడ్ సేఫ్టీ అధికారులు స్పష్టం చేశారు.