తిరుపతిలో చెడిపోయిన మాంసం సరఫరా రాకెట్ బయటపెట్టిన అధికారులు

తిరుపతిలో చెడిపోయిన మాంసాన్ని హోటళ్లకు, మెస్‌లకు సరఫరా చేస్తున్న అక్రమ వ్యాపారాన్ని మున్సిపల్ ఆరోగ్య అధికారులు గుర్తించారు. స్థానిక నివాసితులు దుర్వాసన వస్తోందని ఫిర్యాదు చేయడంతో అధికారులు ఆకస్మిక తనిఖీలు చేపట్టారు.

పీపీ చావడి మాంసం మార్కెట్లో 12 స్టాళ్లలో, చుట్టుపక్కల ఇళ్లలో కూడా భారీ మొత్తంలో కుళ్లిన మాంసం నిల్వ ఉన్నట్లు గుర్తించారు. తలకాయలు, కాళ్లు, కడుపుభాగం, కిడ్నీ, కాలేయం వంటి అవయవాలు నెలల తరబడి ఫ్రిడ్జిలో నిల్వ ఉంచి వాటిని తక్కువ ధరకు స్థానిక హోటళ్లకు సరఫరా చేసినట్లు తెలిసింది.

మున్సిపల్ హెల్త్ ఆఫీసర్ డాక్టర్ యువన్వేష్ మాట్లాడుతూ, “ఈ మాంసం హైదరాబాద్, చెన్నై, బెంగళూరు నుంచి అక్రమంగా తీసుకొచ్చారు. అక్కడ వీటికి డిమాండ్ తక్కువగా ఉండడంతో చాలా తక్కువ ధరకు ఇక్కడ విక్రయిస్తున్నారు. సుమారు టన్ను పైన మాంసాన్ని స్వాధీనం చేసి డంపింగ్ యార్డుకు తరలించాం” అని తెలిపారు. ఈ మాంసం తినడం వల్ల డయేరియా, వాంతులు, తీవ్రమైన అనారోగ్యాలు వచ్చే ప్రమాదం ఉందని హెచ్చరించారు.

అక్రమంగా విక్రయిస్తున్న స్టాళ్ల యాజమాన్యాలకు నోటీసులు జారీ చేసి, మూడు రోజులపాటు స్టాళ్లను తాత్కాలికంగా మూసివేయించారు. ఇటీవల హైదరాబాద్‌లో కూడా ఇలాంటి దాడిలో 14 టన్నుల చెడిపోయిన మాంసం పట్టుబడింది. ప్రజలు అధీకృత డీలర్ల నుంచి మాత్రమే మాంసం కొనుగోలు చేయాలని, ఇలాంటి ఆహారం విషయంలో జాగ్రత్తగా ఉండాలని అధికారులు సూచించారు.