తొలి ఏకాదశి 2025: శయన ఏకాదశి విశిష్టత, ఉపవాసం, పూజా విధానం, దానాలు చేయాల్సిన సమయం

ఆషాఢ శుక్ల ఏకాదశిని తొలి ఏకాదశి లేదా శయన ఏకాదశిగా ఆచరిస్తారు. ఈ రోజు నుండి చాతుర్మాస్య వ్రతం ప్రారంభమవుతుంది. గృహస్తులకు ఈ ఏకాదశి నుండి, యతులకు శుక్ల పౌర్ణమి నుండి దీక్ష మొదలవుతుంది.

ప్రముఖ జ్యోతిష్యులు డాక్టర్ బాచంపల్లి సంతోష్ కుమార్ శాస్త్రి తెలిపిన వివరాల ప్రకారం, ఈ రోజు బ్రాహ్మీ ముహూర్తంలో నిద్ర లేచి, తలంటుస్నానం చేసి, శుభ్రమైన వస్త్రాలు ధరించాలి. ఉదయం విష్ణు సహస్రనామ పారాయణం, సాయంత్రం శివ సహస్రనామ పారాయణం చేయడం వల్ల పాపాలు తొలగిపోతాయి. ఉదయం విష్ణ్వాలయం, సాయంత్రం శివాలయం దర్శించుకోవడం మంచిది.

ఉపవాసం విషయంలో పూర్తి ఉపవాసం లేదా కేవలం నివేదించిన పండు మాత్రమే తీసుకోవచ్చు. ఆరోగ్యాన్ని బట్టి మితాహారంగా ఉండొచ్చు. రోజంతా 'శ్రీరామ జయరామ జయజయరామ' అనే నామం జపించడం ఉత్తమం. వ్యర్థ సంభాషణలు మానుకొని, సాధ్యమైనంత దానాలు చేయాలి.

దక్షిణ భారతదేశంలో ప్రత్యేకంగా ఈ రోజు వరిపాలాల పిండి (సత్తుపిండి) భగవంతుడికి నివేదించి ప్రసాదంగా స్వీకరిస్తారు. ఇది శరీరానికి చలువ చేస్తుంది. శయన ఏకాదశి కావున స్వామివారికి లాలిపాటలు, జోలపాటలు, భజనలు చేయడం ఆచారం. రాత్రి జాగారం చేయడం కూడా విధిగా పేర్కొన్నారు. ఈ రోజున పాండురంగ రుక్మిణి కళ్యాణం కూడా చాలా ప్రాంతాల్లో జరుగుతుంది.

దక్షిణాయన పుణ్యకాలం ఈ రోజు నుండే ప్రారంభమవుతుంది. ఈ కాలంలో అనేక పండుగలు, పితృదేవతా కార్యక్రమాలు ఉంటాయి. ప్రతి హిందువు తమ శక్తిని బట్టి ఏకాదశి వ్రతాన్ని ఆచరించాలని శాస్త్రం చెబుతోంది.