అన్ని సినిమాలకు పర్సంటేజ్ సిస్టమే: తెలంగాణ ఎగ్జిబిటర్లు

తెలంగాణ ఎగ్జిబిటర్లు ఇకపై అన్ని సినిమాలకు పర్సంటేజ్ సిస్టమ్ ప్రకారం మాత్రమే ఆర్డర్లు ఇస్తామని ప్రెస్ మీట్‌లో ప్రకటించారు. పెద్ద సినిమాలు అయినా, చిన్న సినిమాలు అయినా ఇది వర్తిస్తుందని స్పష్టం చేశారు. నిజాం ప్రాంతంలో ఇప్పటికే 60% పర్సంటేజ్ సిస్టమ్ అమలవుతోందని పేర్కొన్నారు.

హనుమకొండ అమృత్ థియేటర్, నరసంపేట జయశ్రీ టాకీస్ నిర్వాహకుడు ఒక ఎగ్జిబిటర్ మాట్లాడుతూ తమ ఆర్థిక సమస్యలు వివరించారు. తమ కుటుంబం 1955 నుంచి థియేటర్ వ్యాపారంలో ఉందని తెలిపారు. నరసంపేటలో ఉన్న మూడు థియేటర్లలో రెండు ఇప్పటికే మూతపడ్డాయని, మిగిలిన ఒక థియేటర్‌కు సినిమాలు లేక వారం వారం మూసేస్తున్నారని చెప్పారు.

ఆ ఒక్క థియేటర్‌కు ఒక వారానికి రూ.50,000 మాత్రమే ఫ్లాట్ రేటుగా ఇస్తున్నారని, మిగతా మూడు వారాలు పర్సంటేజ్ ద్వారా వారానికి రూ.70,000–80,000 వస్తుందని వివరించారు. అయితే నెలవారీ జీతాలు రూ.50,000, కరెంట్ బిల్ రూ.50,000, మెయింటెనెన్స్ రూ.1 లక్ష చొప్పున ఖర్చవుతున్నాయని తెలిపారు. ఈ పరిస్థితుల్లో దాదాపు 20 సెంటర్లు మూతపడే దశకు వచ్చాయని ఆందోళన వ్యక్తం చేశారు.

ఎగ్జిబిటర్లు తమకు ఫస్ట్ వీక్‌లో రూ.1 లక్ష నుంచి రూ.1.5 లక్షల షేర్ వస్తే నెల ఖర్చులు భరించగలమని పేర్కొన్నారు. ప్రొడ్యూసర్లు, డిస్ట్రిబ్యూటర్లు సహకరించాలని విజ్ఞప్తి చేశారు.

ఎగ్జిబిటర్ రఘురామ రెడ్డి మాట్లాడుతూ తాను నాలుగైదు థియేటర్లు renovation చేశానని, అవి ప్రస్తుతం మూతపడే పరిస్థితిలో ఉన్నాయని తెలిపారు. తెలంగాణ స్టేట్ ఫిలిం చాంబర్ ఆఫ్ కామర్స్ కొత్త అధ్యక్షుడిగా జువ్వాడి శేఖర్ రావు ఎంపికయ్యారు. ఆయన 35 సంవత్సరాలకు పైగా సినిమా పరిశ్రమలో అనుభవం ఉందని ఎగ్జిబిటర్లు తెలిపారు.