2026 బాక్సాఫీస్‌కు దూరంగా బాలకృష్ణ, జూనియర్ ఎన్టీఆర్, అల్లు అర్జున్

2026 లో బాక్సాఫీస్ పై అందరి దృష్టి ఉంది. ప్రముఖ నటులు బాలకృష్ణ, జూనియర్ ఎన్టీఆర్, అల్లు అర్జున్ కొత్త సినిమాలతో ప్రేక్షకుల ముందుకు వస్తారని అభిమానులు ఎంతో ఆశగా ఎదురుచూశారు. అయితే ఆయా చిత్రాల నిర్మాణంలో జాప్యం కారణంగా ఈ ముగ్గురూ ఈ ఏడాది విడుదలకు దూరంగా ఉండనున్నారు.

నటుడు బాలకృష్ణ తన తాజా చిత్రం 'అఖండ 2' ఫలితం ఆశించిన స్థాయిలో లేనందున తన తదుపరి సినిమాలో మార్పులు చేశారు. ముందు జానపద నేపథ్యంలో సినిమా తీయాలనుకున్న ఆయన ఇప్పుడు గ్యాంగ్‌స్టర్ డ్రామా తీస్తున్నారు. ఇటీవల ఆయనకు గాయం కావడంతో చిత్రీకరణ ఆగిపోయింది. దాంతో ఆ సినిమా ఈ ఏడాది విడుదల అవుతుందా అన్న సందేహాలు తలెత్తాయి. అలాగే ఆయన 100వ సినిమా నిర్మాణంలో ప్రత్యేక శ్రద్ధ తీసుకుంటున్నందున అది కూడా ఆలస్యం అయ్యే అవకాశం ఉంది.

జూనియర్ ఎన్టీఆర్, దర్శకుడు ప్రశాంత్ నీల్ కాంబినేషన్‌లో వస్తున్న చిత్రం ఈ ఏడాది జూన్‌లో విడుదల కావాల్సి ఉండగా, నిర్మాతలు ఇటీవల కీలక ప్రకటన చేశారు. ఈ సినిమా 2027 జూన్ 11 వరకూ వాయిదా పడిందని, ఏడాది ఆలస్యంగా రిలీజ్ చేస్తున్నట్లు వెల్లడించారు.

మరోవైపు, 'పుష్ప 2' తర్వాత అల్లు అర్జున్ వరుసగా సినిమాల్లో నటిస్తానని అభిమానులకు హామీ ఇచ్చారు. కానీ ఆయన చేస్తున్న ఒక గ్లోబల్ ప్రాజెక్ట్ కారణంగా మరోసారి సినిమా ఆలస్యం అవుతోంది. దీంతో ఆ సినిమా కూడా ఈ ఏడాది విడుదలయ్యే పరిస్థితి కనిపించడం లేదు.

ఈ పరిణామాలతో స్టార్ హీరోల అభిమానులు నిరాశ చెందుతున్నారు.