అర నిమిషంలో టాప్ న్యూస్: ACB దాడి, ABVP ర్యాలీ, మొబైల్ ఫోన్లు రికవరీ, రేషన్ బియ్యం స్వాధీనం

మహబూబ్‌నగర్‌లో సర్వే అండ్ ల్యాండ్ రికార్డ్స్ డిపార్ట్‌మెంట్ సూపరింటెండెంట్ వెంకటేశ్వర్ రెడ్డి ACB కి పట్టుబడ్డారు. భూత్‌పూర్ మండలం కరివెన గ్రామానికి చెందిన రైతు తన వ్యవసాయ ఫలం వివరాలు సరిచేయించుకోవడానికి అధికారులకు దరఖాస్తు చేశాడు. వెంకటేశ్వర్ రెడ్డి పాతిక వేల రూపాయల లంచం డిమాండ్ చేయడంతో బాధిత రైతు ACB ని ఆశ్రయించారు. ACB అధికారులు 15,000 రూపాయల లంచం తీసుకుంటుండగా పట్టుకున్నారు. గతంలో కూడా ఈ అధికారి ACB కి చిక్కిన చరిత్ర ఉంది.

జయశంకర్ భూపాలపల్లి జిల్లా మహాదేవపురం మండలంలో ABVP ఆధ్వర్యంలో మాదక ద్రవ్యాల వ్యతిరేక అవగాహన కార్యక్రమం నిర్వహించారు. డ్రగ్స్ కు నో చెప్పాలని, ఆరోగ్యవంతమైన సమాజాన్ని నిర్మించాలని నినాదాలు చేశారు. సమాచారం ఉంటే వెంటనే పోలీసులకు తెలియజేయాలని SI సాంభమూర్తి సూచించారు. డ్రగ్స్ వల్ల కలిగే ఆరోగ్య సమస్యలను డాక్టర్ హరిణి వివరించారు.

హైదరాబాద్ సైదాబాద్ పోలీస్ స్టేషన్ పరిధిలో పోగొట్టుకున్న 20 మొబైల్ ఫోన్లను CEIR పోర్టల్ సహాయంతో గుర్తించి బాధితులకు అప్పగించారు. ఇతర రాష్ట్రాల్లో ఉన్న ఫోన్లను కూడా ట్రేస్ చేసి స్వాధీనం చేసుకున్నారు. మొబైల్ పోయినా లేదా చోరీకి గురైనా వెంటనే పోలీసులకు లేదా CEIR పోర్టల్ లో ఫిర్యాదు చేయాలని పోలీసులు సూచించారు.

రంగారెడ్డి జిల్లా మైలార్‌దేవపల్లి పోలీస్ స్టేషన్ పరిధిలోని హౌసింగ్ బోర్డ్ కాలనీలో నిల్వ ఉంచిన రేషన్ బియ్యం మరియు గోధుమలను పోలీసులు స్వాధీనం చేసుకున్నారు. మీర్ అహ్మద్ అలీ అనే వ్యక్తిని అదుపులోకి తీసుకొని విచారించారు. నాలుగు క్వింటాళ్ల PDS బియ్యం, నాలుగు క్వింటాళ్ల గోధుమలు స్వాధీనం చేసుకొని కేసు నమోదు చేశారు.