ములుగు అటవీ ప్రాంతంలో టోర్నడో తరహా సుడిగాలి; వందలాది చెట్లు నేలకూలాయి

ములుగు జిల్లాలోని అటవీ ప్రాంతంలో గురువారం టోర్నడో తరహా సుడిగాలి వీచింది. మంగపేట మండలంలోని శాంతినగర్ నుంచి కోమటిపల్లి వెళ్లే ప్రధాన మార్గంపై వందలాది భారీ వృక్షాలు విరిగిపడ్డాయి. దీంతో రాకపోకలు నిలిచిపోయాయి.

సమాచారం అందుకున్న పోలీసులు, స్థానికులు జేసీబీల సహాయంతో రంగంలోకి దిగి గంటల తరబడి శ్రమించి రహదారిని క్లియర్ చేశారు. అదృష్టవశాత్తు సుడిగాలి శాంతినగర్ గ్రామాన్ని తప్పించుకుంది, ప్రాణనష్టం జరగలేదు.

గతంలో మేడారం ప్రాంతంలోనూ ఇలాంటి సుడిగాలుల వల్ల వేలాది చెట్లు ధ్వంసమయ్యాయని స్థానికులు గుర్తుచేశారు. ఈ ఘటనపై శాస్త్రీయ పరిశీలన జరిపి స్పష్టత ఇవ్వాలని వారు కోరుతున్నారు.