14 రాష్ట్రాల్లో SIR వల్ల 5.9 కోట్ల ఓట్లు తొలగింపు: TPCC చీఫ్ మహేష్ కుమార్ గౌడ్

TPCC అధ్యక్షుడు మహేష్ కుమార్ గౌడ్ Special Intensive Revision (SIR) ప్రక్రియపై తీవ్ర ఆరోపణలు చేశారు. 14 రాష్ట్రాలు మరియు కేంద్ర పాలిత ప్రాంతాల్లో జరిగిన SIR వల్ల దాదాపు 8.22 కోట్ల ఓట్లు జోడించగా, 5.90 కోట్ల ఓట్లు తొలగించారని ఆయన అన్నారు.

పశ్చిమ బెంగాల్ ఎన్నికల్లో రాజకీయ సమీకరణలు మారడానికి ఈ ఓట్ల తొలగింపే కారణమని మహేష్ కుమార్ గౌడ్ పేర్కొన్నారు. SIR ప్రక్రియ నిదర్శనంగా బెంగాల్ ఎన్నికలను ఆయన ఉదహరించారు.

తెలంగాణలో వచ్చే రెండు సంవత్సరాలు ఎన్నికలు లేవని, అందువల్ల SIR ప్రక్రియను రెండు–మూడు నెలల్లో పూర్తి చేయకుండా సంవత్సరం పొడవున నిర్వహించాలని ఆయన డిమాండ్ చేశారు. ఒకే విజిట్‌తో ఇల్లు లాక్ కనుపిస్తే ఓటు పోయే ప్రమాదం ఉందని, కనీసం మూడు నాలుగుసార్లు ఫిజికల్ విజిట్ చేయాలని ఆయన కోరారు.

తెలంగాణ నుండి గెలిచిన ఎనిమిది BJP MP లలో సగం మంది దొంగ ఓట్లతో గెలిచారని మహేష్ కుమార్ గౌడ్ ఆరోపించారు. బండి సంజయ్, కిషన్ రెడ్డి పేర్లు ప్రత్యేకంగా ప్రస్తావించారు. ఈ ఆరోపణలపై BJP స్పందన తెలియాల్సి ఉంది.