ట్రైనీ IPS ఉదయ్ కృష్ణా రెడ్డి కేసులో మరోసారి కస్టడీ కోరిన పోలీసులు

హైదరాబాద్‌లో ట్రైనీ IPS ఉదయ్ కృష్ణా రెడ్డిపై లైంగిక వేధింపుల కేసులో పోలీసులు మరోసారి కస్టడీకి దరఖాస్తు చేశారు. గతంలో రెండు రోజుల కస్టడీ విచారణలో ఆయన సహకరించలేదని, కీలక విషయాలు తెలుసుకునేందుకు మళ్లీ కస్టడీ అవసరమని ఉప్పల్‌ కోర్టులో పిటిషన్ దాఖలు చేశారు. ఈ పిటిషన్‌పై ఈ రోజు విచారణ జరిగే అవకాశం ఉంది.

కస్టడీ విచారణ సందర్భంగా ఉదయ్ కృష్ణా రెడ్డి చాలా ప్రశ్నలకు స్పష్టమైన సమాధానాలు ఇవ్వలేదని పోలీస్ వర్గాలు తెలిపాయి. కొన్ని ప్రశ్నలకు గుర్తులేదని, మరికొన్నింటికి సమాధానం చెప్పేందుకు నిరాకరించినట్లు సమాచారం. ఉమెన్ సేఫ్టీ DCP లావణ్య నాయక్ నేతృత్వంలో ప్రత్యేక బృందం రెండు రోజుల పాటు ఆయనను ప్రశ్నించింది. కస్టడీ పూర్తయ్యాక పోలీసులు ఆయనను కోర్టులో హాజరుపరిచారు.

కేసు విచారణను హైదరాబాద్ పోలీస్ కమిషనర్ సచినర్ నేరుగా పర్యవేక్షిస్తున్నారు. సీపీ సచినర్ స్వయంగా నిందితుడిని ప్రశ్నించినట్లు తెలిసింది. ఇప్పటివరకు లభించిన ఆధారాలపై కూడా ఆరా తీశారు. మరోవైపు సాంకేతిక ఆధారాల సేకరణపై పోలీసులు దృష్టి సారించారు. కాల్ డేటా రికార్డులు, మొబైల్ ఫోరెన్సిక్స్, చాట్ హిస్టరీ, సోషల్ మీడియా కమ్యూనికేషన్, లొకేషన్ డేటా వంటి డిజిటల్ ఆధారాలను విశ్లేషిస్తున్నట్లు తెలుస్తోంది.