GO 3 పునరుద్ధరణ కోసం మన్యంలో ఆదివాసీల బంద్

అల్లూరి సీతారామరాజు జిల్లా ఏజెన్సీ ప్రాంతాల్లో GO నంబర్ 3 పునరుద్ధరణ కోసం ఆదివాసీ సంఘాలు బంద్ నిర్వహించాయి. ప్రపంచ ఆదివాసి దినోత్సవం సందర్భంగా వేలాది మంది గిరిజన యువత, నాయకులు తెల్లవారుజామునే రోడ్లపైకి వచ్చారు. వారు ప్రైవేట్ వాహనాలను అడ్డుకున్నారు. ధర్నాలు నిర్వహించారు. పాడేరు, అరకులోయ, పెదబాయలు, ముంచంగిపుట్టు, డుంబ్రిగూడా, హుకుంపేట మండలాల్లో దుకాణాలు, హోటళ్లు, పెట్రోల్ బంకులు స్వచ్ఛందంగా మూసుకున్నాయి. పర్యాటక కార్మికులు, వర్తక సంఘాలు సైతం మద్దతు తెలిపాయి.

పాడేరు RTC కాంప్లెక్స్ దగ్గర ఆందోళనకారులు ప్రైవేట్ వాహనాలను అడ్డుకోవడంతో కాసేపు ఉద్రిక్తత ఏర్పడింది. పోలీసులు భారీ భద్రత ఏర్పాటు చేశారు. RTC బస్సులు నడిచినా ప్రయాణికులు లేక ఖాళీగా ఉన్నాయి. ఉద్రిక్తతలు నియంత్రించేందుకు పోలీసులు పలువురు గిరిజన నాయకులను ముందస్తుగా గృహ నిర్బంధం చేశారు.

ఈ నిరసన కొత్తదేమీ కాదు. గత నెలలో 11 మండలాల నుంచి వేలాది మంది గిరిజనులు ఐటీడీఏ కార్యాలయాన్ని ముట్టడించారు. GO 3 పునరుద్ధరణపై ప్రభుత్వం నుంచి స్పష్టమైన హామీ రాకపోవడంతో మళ్లీ బంద్ నిర్వహించారు.

2000 సంవత్సరంలో అప్పటి ఉమ్మడి ఆంధ్రప్రదేశ్ ప్రభుత్వం GO నంబర్ 3 జారీ చేసింది. దీని ప్రకారం ఐటీడీఏ పరిధిలో వచ్చే ప్రభుత్వ ఉద్యోగాల్లో 100% స్థానిక గిరిజనులకే రిజర్వేషన్ కల్పించారు. అయితే 100% రిజర్వేషన్లు రాజ్యాంగ విరుద్ధమని సుప్రీంకోర్టు ఈ నిర్ణయాన్ని కొట్టేసింది. దీంతో గిరిజన నిరుద్యోగులు నష్టపోతున్నారు. కేంద్ర, రాష్ట్ర ప్రభుత్వాలు చొరవ తీసుకుని ప్రత్యేక ఆర్డినెన్స్ లేదా పార్లమెంట్లో చట్టం చేయాలని, 1/70 భూరక్షణ చట్టాన్ని కూడా పరిరక్షించాలని ఆదివాసీలు డిమాండ్ చేస్తున్నారు.

ప్రభుత్వం ప్రతిపాదించిన హై పవర్ కమిటీని ఆదివాసీ సంఘాలు తిరస్కరించాయి. కమిటీ పేరుతో ప్రభుత్వం కాలయాపన చేస్తోందని ఆరోపించాయి. ఆదివాసి దినోత్సవం నాడు GO 3 పునరుద్ధరణపై అధికారిక ప్రకటన రావాలని డిమాండ్ చేశాయి. లేనిపక్షంలో రాష్ట్రవ్యాప్తంగా ఉద్యమం తీవ్రతరం చేస్తామని గిరిజన JAC హెచ్చరించింది.