గో నెం.3 పునరుద్ధరణ, 100% రిజర్వేషన్ డిమాండ్‌తో చింతూరు డివిజన్‌లో గిరిజనుల రోడ్డు దిగ్బంధం

చింతూరు డివిజన్‌లోని చింతూరు, కూనవరం, విఆర్పురం, ఎటపాక మండలాల్లో ప్రపంచ ఆదివాసి దినోత్సవం సందర్భంగా గిరిజన సంఘాలు రోడ్డు దిగ్బంధం నిర్వహించాయి.

గత ప్రభుత్వం రద్దు చేసిన జీవో నెంబర్ 3ను పునరుద్ధరించాలని, షెడ్యూల్డ్ ఏరియాల్లో గిరిజనులకు 100% ఉద్యోగ రిజర్వేషన్ కల్పించాలని ఆందోళనకారులు డిమాండ్ చేశారు. 1/70 భూమి బదలాయింపు నిషేధ చట్టాన్ని కచ్చితంగా అమలు చేయాలని, పోడు భూముల పట్టాలు ఇవ్వాలని కోరారు. గిరిజన నిరుద్యోగులకు ప్రత్యేక డీఎస్సీ నిర్వహించాలని కూడా డిమాండ్ చేశారు.

రాజ్యాంగంలోని ఐదో, ఆరో షెడ్యూళ్లు, ఆర్టికల్ 341, 342ల ద్వారా తమకు సంక్రమించిన హక్కులను అమలు చేయాలని నిరసనకారులు నినదించారు. 1/70 చట్టానికి సంబంధించి కోర్టులో పిటిషన్ వేసినట్లు తెలిపారు. ఎలాంటి అవాంఛనీయ సంఘటనలు జరగకుండా చింతూరు డివిజన్ పోలీసులు భారీ బందోబస్తు ఏర్పాటు చేశారు.

రాష్ట్రవ్యాప్తంగా గిరిజన సంఘాలు పిలుపు మేరకు మన్యం బంద్‌లో భాగంగా ఈ ఆందోళన జరిగింది. ప్రస్తుతం ప్రభుత్వం నుంచి ఈ డిమాండ్లపై ఎలాంటి స్పందన లేదు.