నాగార్జున సాగర్‌లో TRS జెండా గద్దె కూల్చివేత: పోలీసులకు ఫిర్యాదు

నల్గొండ జిల్లా నాగార్జున సాగర్‌లోని పైలాన్ క్రాస్ రోడ్‌ వద్ద నిర్మించిన TRS పార్టీ జెండా గద్దెను మున్సిపల్ అధికారులు కూల్చివేశారు. ఈ ఘటన ఆ ప్రాంతంలో ఉద్రిక్తతకు దారితీసింది.

అధికార పార్టీ నేతల ఒత్తిడితోనే మున్సిపల్ అధికారులు ఈ చర్య తీసుకున్నారని TRS నాయకులు ఆరోపించారు. ఈ కూల్చివేతకు నిరసనగా నందికొండ మున్సిపల్ కార్యాలయం ఎదుట పార్టీ నేతలు ఆందోళన నిర్వహించారు.

ఘటనపై విజయపురి సౌత్ పోలీస్ స్టేషన్‌లో TRS నాయకులు ఫిర్యాదు చేశారు. అధికారులపై చర్యలు తీసుకోవాలని కోరారు.

అయితే, ఈ ఘటనపై మున్సిపల్ అధికారులు భిన్నమైన వివరణ ఇచ్చారు. నిబంధనలకు విరుద్ధంగా, ఎలాంటి అనుమతీ లేకుండా ఈ గద్దె నిర్మించారని, అందుకే దాన్ని కూల్చివేశామని అధికారులు తెలిపారు.