ట్రంప్ ప్రభుత్వం 3 బిలియన్ డాలర్ల చారిత్రాత్మక మైనింగ్ పెట్టుబడులు ప్రకటించింది

అమెరికా అధ్యక్షుడు డొనాల్డ్ ట్రంప్ దేశంలో కీలక ఖనిజాల మైనింగ్‌కు 3 బిలియన్ డాలర్ల (సుమారు 300 కోట్ల డాలర్ల) పెట్టుబడిని ప్రకటించారు. ఈ పెట్టుబడితో వేలాది ఉద్యోగాలు సృష్టించడంతోపాటు ఆర్థిక స్థిరత్వం, భద్రత కూడా పెరుగుతాయని ఆయన చెప్పారు. ఈ ప్రకటనలో భాగంగా అమెరికా ఇంధన శాఖ ఆఫీస్ ఆఫ్ స్ట్రాటజిక్ క్యాపిటల్ వాషింగ్టన్ రాష్ట్రంలో తదుపరి తరం బ్యాటరీ తయారీ కేంద్రం నిర్మాణానికి సిలా నానోటెక్నాలజీస్‌తో 1.4 బిలియన్ డాలర్ల రుణ ఒప్పందంపై సంతకం చేసింది. దేశీయ లిథియం-అయాన్ బ్యాటరీ ఉత్పత్తిలో ఇది కీలకం కానుంది. అలాగే ఎక్స్పోర్ట్-ఇంపోర్ట్ బ్యాంకు (ఎక్సిమ్ బ్యాంకు) అరిజోనాలోని శాంటాక్రూజ్ రాగి ప్రాజెక్టుకు 1 బిలియన్ డాలర్లకు పైగా నిధులు సమకూర్చేందుకు సిద్ధమవుతోంది. ప్రపంచంలోనే అతి పెద్ద రాగి ప్రాజెక్టుల్లో ఇదొకటి. ఇంకా అలబామా గ్రాఫైట్ ప్రాజెక్టుకు 25 మిలియన్ డాలర్లు, దక్షిణ కాలిఫోర్నియాలో ఫోర్ట్ కేడీ ఇంటిగ్రేటెడ్ బోరాన్ సౌకర్యానికి కూడా ఎక్సిమ్ బ్యాంకు పెట్టుబడి పెడుతోంది. ట్రంప్ మాట్లాడుతూ, గతంలో పర్యావరణ అడ్డంకులు ఇలాంటి ప్రాజెక్టులను నిలిపివేసాయని, పర్యావరణాన్ని సాకుగా చూపించి అన్నింటినీ ఆపేవారని విమర్శించారు. 'నేను కూడా పర్యావరణ పరిరక్షకుడినే కానీ, ఆ సాకుతో అన్నింటినీ నిలిపివేయడం తగదు' అని ఆయన అన్నారు. ఈ ప్రాజెక్టులు అమెరికా ఎలక్ట్రిక్ వాహనాలు, డిఫెన్స్ టెక్నాలజీ రంగాలకు కావాల్సిన కీలక ఖనిజాలను సరఫరా చేయడంతోపాటు, చైనాపై ఆధారపడటాన్ని తగ్గించేందుకు ఉపయోగపడతాయి.