ట్రంప్ ప్రకటన: ఇరాన్‌తో ఒప్పందం ఖరారు; సత్వరమే సంతకాలు, చమురు ధరలు తగ్గుతాయని ఆశాభావం

అమెరికా అధ్యక్షుడు డొనాల్డ్ ట్రంప్ ఇరాన్‌తో ఒప్పందం కుదిరిందని ప్రకటించారు. సత్వరలోనే ఈ ఒప్పందంపై సంతకాలు జరుగుతాయని ఆయన వెల్లడించారు. ఇరాన్ ఇకపై అణ్వాయుధాన్ని తయారు చేయదని ట్రంప్ పునరుద్ఘాటించారు.

కొద్ది రోజుల క్రితమే ఇరాన్‌పై బాంబు దాడులు చేస్తామని ట్రంప్ హెచ్చరించగా, ఆయనే కొన్ని గంటల్లోనే మాట మార్చి దాడులను రద్దు చేసినట్లు తెలిపారు. ఇరాన్‌తో చర్చలు కొలిక్కి వచ్చాయని, ఆ దేశ అగ్ర నాయకత్వం తమ ప్రతిపాదనలను అంగీకరించిందని ట్రంప్ చెప్పారు. అయితే ఇరాన్ నుంచి ఇప్పటివరకు ఎలాంటి అధికారిక ప్రకటన రాలేదు.

ట్రంప్ వివరాల ప్రకారం, గత నెల రోజుల్లో అమెరికా సేనలు రహస్యంగా ఇరాన్‌పై సైనిక చర్యలు చేపట్టాయి. ఇరాన్‌కు చెందిన పెద్ద ఓడలను ధ్వంసం చేసి, రాడార్ వ్యవస్థలను నాశనం చేసినట్లు ఆయన వెల్లడించారు. ఈ ఆపరేషన్లు ఇరాన్‌ కనుగొనలేకపోయిందని చెప్పారు.

ఇరాన్ మూసివేసిన హర్మూజ్ జలసంధి త్వరలోనే తిరిగి తెరుచుకుంటుందని ట్రంప్ ప్రకటించారు. దీంతో అంతర్జాతీయ మార్కెట్లో చమురు ధరలు తగ్గుతాయని, వస్తువుల ధరలు తగ్గుతాయని ఆయన ఆశాభావం వ్యక్తం చేశారు. ఈ ఒప్పందానికి ఇజ్రాయిల్, సౌదీ అరేబియాతోపాటు అనేక దేశాలు సమ్మతి తెలిపాయన్నారు.

ఒప్పందానికి సంబంధించిన డాక్యుమెంటేషన్ తుది దశలో ఉందని, కొద్ది రోజుల్లో ఐరోపాలో సంతకాల కార్యక్రమం జరగవచ్చని ట్రంప్ సంకేతాలిచ్చారు. ఈ సంతకాల వేడుకకు ఉపాధ్యక్షుడు జె.డి. వాన్స్ హాజరవుతారని తాను వెళ్లడం లేదని చెప్పారు. ఈ ఒప్పందం ద్వారా ప్రపంచ ఆర్థిక వ్యవస్థకు ఊరట లభిస్తుందని ట్రంప్ పేర్కొన్నారు.