ఇరాన్‌తో గొప్ప ఒప్పందంపై సంతకాలు కొద్ది రోజుల్లోనే: ట్రంప్ ప్రకటన

అమెరికా అధ్యక్షుడు డొనాల్డ్ ట్రంప్ ఇరాన్‌తో యుద్ధాన్ని ముగించే గొప్ప ఒప్పందంపై రాబోయే కొద్ది రోజుల్లో సంతకాలు జరుగుతాయని ప్రకటించారు. బహుశా యూరప్‌లో జరిగే ఈ సంతకం కార్యక్రమానికి ఉపాధ్యక్షుడు జేడీ వెన్స్ హాజరవుతారని తెలిపారు. డాక్యుమెంట్లు దాదాపు పూర్తి స్థాయిలో ఉన్నాయని, ఇరాన్ కూడా మిగతా అందరిలాగే ఈ ఒప్పందాన్ని కోరుకుంటోందని ట్రంప్ వివరించారు. ఈ వార్త నేపథ్యంలో అమెరికా స్టాక్ మార్కెట్ వెయ్యి పాయింట్లు పెరిగింది. చమురు ధరలు కూడా భారీగా తగ్గుతాయని, గతంలో ఉన్న స్థాయి కంటే దిగువకు వస్తాయని ట్రంప్ అంచనా వేశారు. చమురు ధర తగ్గితే అన్ని వస్తువుల ధరలు తగ్గుతాయని ఆయన పేర్కొన్నారు. ఈ ఒప్పందంలో కీలకమైన అంశం ఏంటంటే — ఇరాన్ ఎప్పటికీ అణ్వాయుధాన్ని కలిగి ఉండదు. ఇదే ఈ మొత్తం ప్రక్రియ వెనుకున్న అసలు లక్ష్యమని ట్రంప్ స్పష్టం చేశారు. ఇజ్రాయెల్ ప్రధాని బెంజమిన్ నెతన్యాహుతో పాటు ఖతార్, యూఏఈ, సౌదీ అరేబియా, బహ్రెయిన్, కువైట్ సహా అనేక దేశాల నేతలతో తాను మాట్లాడినట్లు ట్రంప్ వెల్లడించారు. పాకిస్థాన్ ప్రధాని, ఆర్మీ చీఫ్‌తో కూడా చర్చించానని తెలిపారు. మొత్తం మిడిల్ ఈస్ట్ సంతోషంగా ఉందని, ఈ ఒప్పందంపై సంతకాలు పడగానే స్ట్రెయిట్ ఆఫ్ హోర్ముజ్ తిరిగి తెరుచుకుంటుందని ట్రంప్ ధృవీకరించారు. ఇప్పటికే అక్కడ చాలా నౌకలను తొలగించామని, సంతకాల తర్వాత అధికారికంగా మార్గం తెరుచుకుంటుందని వివరించారు. ఇరాన్‌తో ఈ ఒప్పందం వల్ల అనేక మంచి సంబంధాలు ఏర్పడతాయని ట్రంప్ ఆశాభావం వ్యక్తం చేశారు.