హార్మజ్ జలసంధి అందరికీ తెరిచే ఉంటుంది — ట్రంప్

అమెరికా అధ్యక్షుడు డొనాల్డ్ ట్రంప్ హార్మజ్ జలసంధిపై స్పష్టమైన వైఖరి తెలిపారు — ఇరాన్ లేదా ఒమాన్ ఆ జలమార్గాన్ని నియంత్రించడానికి అనుమతించబోమని హెచ్చరించారు. ఇది అంతర్జాతీయ జలాలు అని, అమెరికా దానిపై నిఘా ఉంచుతుందని, కానీ ఏ దేశానికీ నియంత్రణ ఇవ్వబోదని ట్రంప్ స్పష్టం చేశారు.

హార్మజ్ జలసంధిలో ప్రస్తుతం సుమారు 14,500 నౌకలు ఆగిపోయాయని, సరైన సమయంలో వాటిని విడుదల చేస్తామని ట్రంప్ తెలిపారు. ఒమాన్ కూడా అందరిలాగే వ్యవహరించాలని, లేకుంటే పరిణామాలు ఎదుర్కోవాల్సి వస్తుందని ఆయన హెచ్చరించారు.

ఇరాన్ అణ్వాయుధం సంపాదించకుండా అడ్డుకోవడమే తన ప్రాథమిక లక్ష్యమని ట్రంప్ చెప్పారు. B2 బాంబర్లతో దాడి చేయకపోతే ఇరాన్ రెండు వారాల్లో అణ్వాయుధం సిద్ధం చేసుకునేదని, అది ఇజ్రాయెల్‌పై ప్రయోగించేవారని ఆయన పేర్కొన్నారు. తన మొదటి పదవీకాలంలో Obama-Iran nuclear deal రద్దు చేయకపోతే ఇరాన్ చాలా కాలం క్రితమే అణ్వాయుధం సాధించేదని ట్రంప్ అన్నారు.

ఇరాన్ అణ్వాయుధం పొందితే దాన్ని వెంటనే ఉపయోగిస్తుందని, ఆలోచించే సమయం తీసుకోదని ట్రంప్ హెచ్చరించారు. దేశంలో పెట్రోల్ ధరలు ఇంకా అధికంగా ఉన్నాయని విలేకరులు ప్రశ్నించగా, ఈ పరిస్థితి త్వరలో మెరుగవుతుందని, ధరలు మునుపటి స్థాయికి తగ్గుతాయని ట్రంప్ హామీ ఇచ్చారు.

హార్మజ్ జలసంధి గుండా ప్రపంచ చమురు సరఫరాలో దాదాపు 20 శాతం రవాణా అవుతుంది. ఈ మార్గం మూసుకుపోతే అంతర్జాతీయ మార్కెట్లలో చమురు ధరలు భారీగా పెరిగే ప్రమాదం ఉంది.