ఇరాన్ చమురు ఆంక్షలు తొలగిస్తే.. అమెరికా రైతులకు మేలు: ట్రంప్

అమెరికా అధ్యక్షుడు డొనాల్డ్ ట్రంప్ ఇరాన్ చమురు ఆంక్షల ఎత్తివేతపై కీలక వ్యాఖ్యలు చేశారు. ట్రెజరీ శాఖ ఇరాన్ చమురుపై ఆంక్షలు ఎత్తేసిందనే వార్తలపై స్పందిస్తూ.. ఒకవేళ ఆంక్షలు తొలగిస్తే అమెరికాలోకి డబ్బు వస్తుందని, ఆ డబ్బు తిరిగి ఆహార ధాన్యాల కొనుగోళ్ల రూపంలో అమెరికా రైతులకు చేరుతుందని ఆయన అన్నారు. ఇరాన్‌లో 9 కోట్లకు పైగా జనాభా ఉన్నా వారికి సరిపడా ఆహార ధాన్యాలు లేవని, ఆ దేశం ఆహారాన్ని కొనుగోలు చేయాల్సిన అవసరం ఉందని ట్రంప్ వివరించారు.

బుధవారం ట్రెజరీ ఇరాన్ చమురు సంబంధిత కొన్ని ఆంక్షలు ఎత్తివేసినట్లు వార్తలు వచ్చాయి. ఈ నేపథ్యంలో ట్రంప్‌ను విలేకరులు ఈ విషయమై ప్రశ్నించగా ఆయన ఈ వ్యాఖ్యలు చేశారు. అయితే ఆంక్షల ఎత్తివేత స్థితిని ఇంకా నిర్ధారించుకోవాల్సి ఉందని కూడా ఆయన స్పష్టం చేశారు.

2018లో అమెరికా ఇరాన్ అణు ఒప్పందం నుంచి వైదొలగినప్పటి నుంచి ఇరువురి మధ్య ఉద్రిక్తతలు కొనసాగుతున్నాయి. చమురు ఎగుమతులపై విధించిన ఆంక్షలతో ఇరాన్ ఆర్థిక వ్యవస్థ తీవ్రంగా దెబ్బతింది. ఇపుడు ట్రంప్ చేసిన వ్యాఖ్యలు ఇరాన్‌తో దౌత్య సంబంధాలపై సానుకూల సంకేతాలిస్తున్నాయి. అంతర్జాతీయ చమురు మార్కెట్లో ఇరాన్ కీలక ఉత్పత్తిదారు. ఆంక్షలు ఎత్తివేస్తే ప్రపంచ చమురు ధరలపై ప్రభావం పడొచ్చు. భారత్ వంటి దేశాలకు చౌక చమురు దిగుమతి అవకాశాలు మెరుగుపడే అవకాశం ఉంటుంది.