తిరుపతిలో TTD 600 కోట్లతో నిర్మిస్తున్న వసతి సముదాయాలు 90% పూర్తి; బ్రహ్మోత్సవాల నాటికి అందుబాటులోకి

తిరుపతిలో TTD ఆధ్వర్యంలో రూ.600 కోట్లతో రెండు భారీ వసతి సముదాయాలు నిర్మిస్తున్నారు. తిరుపతి రైల్వే స్టేషన్ వెనుకవైపు ఉన్న గోవిందరాజస్వామి ఉచిత సత్రాల స్థానంలో ఈ కొత్త భవనాలు వస్తున్నాయి. ప్రస్తుతం 90 శాతానికి పైగా పనులు పూర్తయ్యాయి. శ్రీవారి బ్రహ్మోత్సవాల నాటికి భక్తులకు అందుబాటులోకి తేవాలనే లక్ష్యంతో నిర్మాణం వేగంగా సాగుతోంది.

స్త్రీపాదం, అచ్యుతం పేర్లతో నిర్మిస్తున్న ఈ రెండు సముదాయాలు ఒక్కొక్కటి 9 అంతస్తులతో నిర్మిస్తున్నారు. రెండు భవనాల్లో మొత్తం 1,064 గదులు ఉంటాయి. ఒక్కో భవనంలో 532 గదులు ఏర్పాటు చేస్తున్నారు. ఈ గదుల ద్వారా ఒకేసారి 10 వేల మందికి పైగా భక్తులు వసతి పొందగలరు.

1959లో తమిళనాడు మాజీ ముఖ్యమంత్రి కామరాజ్ ప్రారంభించిన పాత సత్రాలను తొలగించి 2024 మార్చిలో ఈ కొత్త సముదాయాల నిర్మాణం మొదలైంది. రెండో అంతస్తులో రిసెప్షన్, అన్నదానం వసతి కేంద్రాలు ఏర్పాటు చేస్తున్నారు. మూడు, నాలుగు అంతస్తుల్లో 48 డార్మిటరీలు, సుమారు 7 వేల మందికి సరిపడా లాకర్ల సౌకర్యం కల్పిస్తున్నారు.

ప్రస్తుతం విద్యుత్, మౌలిక సదుపాయాల పనులు వేగంగా జరుగుతున్నాయి. శ్రీనివాసం, మాధవం, విష్ణు నివాసం, పద్మావతి అతిథి గృహం వంటి TTD వసతి గృహాలు సరిపోక భక్తులు ప్రైవేట్ హోటళ్లపై ఆధారపడాల్సిన పరిస్థితి ఉంది. ఈ కొత్త సముదాయాలు అందుబాటులోకి వస్తే తిరుమల యాత్రికులకు వసతి సమస్య గణనీయంగా తగ్గనుంది.