తుమ్మిడిహట్టిలో రెండు బరాజుల నిర్మాణ ప్రతిపాదన; సాంకేతిక నిపుణులు హెచ్చరిక

తెలంగాణ ప్రభుత్వం తుమ్మిడిహట్టి వద్ద రెండు బరాజుల నిర్మాణ ప్రతిపాదనను పరిశీలిస్తోంది. వార్ధా, వైన్గంగా నదులపై వేర్వేరుగా బరాజులు నిర్మించి, వాటిని సుమారు 2.1 కిలోమీటర్ల పొడవైన కాంక్రీట్ నిర్మాణంతో అనుసంధానించి కృత్రిమ జలాశయం ఏర్పాటు చేయాలని ఈ ప్రణాళిక లక్ష్యంగా ఉన్నట్లు సమాచారం.

సంబంధిత ఏజెన్సీ ఈ ప్రణాళికను సిద్ధం చేయగా, ప్రభుత్వం సూత్రప్రాయంగా ఆమోదించినట్లు తెలుస్తోంది. గతంలో ఇదే ప్రాంతంలో 152 మీటర్ల ఎఫ్ఆర్ఎల్తో ఒకే బరాజ్ నిర్మించాలన్న ప్రతిపాదన సాంకేతిక ఇబ్బందులు, మహారాష్ట్ర అభ్యంతరాలు, పర్యావరణ అనుమతుల కారణంగా వెనక్కి తగ్గింది. తాజా ప్రతిపాదనలో 150 మీటర్ల ఎఫ్ఆర్ఎల్తో రెండు బరాజుల డిజైన్‌ను తీసుకువచ్చారు.

ఈ డిజైన్పై ఇరిగేషన్ నిపుణులు అనుమానాలు వ్యక్తం చేస్తున్నారు. ఒకే చోట వేర్వేరు నదులపై రెండు బరాజులు, ఆపై సుదీర్ఘ కాంక్రీట్ అనుసంధానం ఇప్పటివరకు ప్రపంచంలో ఎక్కడా లేదని వారు పేర్కొంటున్నారు. నదీ ప్రవాహ వేగాల్లో తేడాల వల్ల సంగమ ప్రాంతంలో సుడిగుండాలు, అధిక పీడనం ఏర్పడి బరాజులపై ప్రభావం చూపుతాయని, దీర్ఘకాలంలో నిర్మాణం సురక్షితంగా ఉండదని హెచ్చరిస్తున్నారు. బరాజుల ఆపరేషన్ ప్రోటోకాల్ వేర్వేరుగా నిర్వహించాల్సి రావడంతో నీటి నిల్వ సామర్థ్యంపై కూడా సందేహాలు లేవనెత్తుతున్నారు.

మరోవైపు, కాళేశ్వరం ప్రాజెక్టులోని మేడిగడ్డ బరాజ్‌లో రెండు పిల్లర్ల మరమ్మత్తులు రెండున్నరేళ్లుగా పూర్తి కాలేదు. ఈ నేపథ్యంలో ప్రభుత్వం తుమ్మిడిహట్టి ప్రతిపాదనపై దృష్టి పెట్టడం విమర్శలకు దారితీస్తోంది. మహారాష్ట్రతో ఒప్పందం లేకుండా ఏకపక్షంగా ముందుకు వెళ్లడం చట్టపరమైన సమస్యలను తెచ్చిపెట్టగలదని నీటిపారుదల నిపుణులు అభిప్రాయపడుతున్నారు. ఈ వ్యవహారంలో ప్రభుత్వం అధికారికంగా స్పందించలేదు.