తుంగభద్రకు వరద తగ్గింది; తాగునీటికే నీటి విడుదల: అధికారులు

తుంగభద్ర జలాశయానికి వచ్చే వరద ప్రవాహం గణనీయంగా తగ్గింది. గత మూడు రోజుల పాటు లక్ష క్యూసెక్కులకు పైగా ఉన్న ఇన్‌ఫ్లో ప్రస్తుతం 40,000 క్యూసెక్కులకు పడిపోయింది.

జలాశయంలో నీటి మట్టం 1622 అడుగులు కాగా, నిల్వ 68.77 టీఎంసీలుగా ఉంది. అధికారులు తాగునీటి అవసరాలకు మాత్రమే నీటిని విడుదల చేస్తున్నారు. కర్నూలు జిల్లా తాగునీటి కోసం 350 క్యూసెక్కులు, బళ్లారి తాగునీటి కోసం కాలువల ద్వారా మొత్తం 1497 క్యూసెక్కులు విడుదల చేస్తున్నట్టు వెల్లడించారు.

ఆగస్టు 10 నుంచి హెచ్‌ఎల్‌సీ కాలువకు 1500 క్యూసెక్కుల నీరు విడుదల చేయాలని టీబీ బోర్డుకు ఇండెంట్ ఇచ్చారు. ఈ నీటిని పూర్తిగా తాగునీటి అవసరాలకే వినియోగించాలని జిల్లా యంత్రాంగం నిర్ణయించింది. సాగుకు నీరు విడుదల చేయడానికి నీటి నిల్వ సరిపోదని అధికారులు ప్రభుత్వానికి నివేదించారు.

ఎల్నినో ప్రభావంతో ఇటీవలి కాలంలో జలాశయంలో నీటి లభ్యత తక్కువగా ఉండేది. ప్రస్తుతం వచ్చిన వరద నీరు తాగునీటి అవసరాలకు మాత్రమే సరిపోతుందని అధికారులు పేర్కొన్నారు. జూలై 16 నుండి ఎల్‌ఎల్‌సీ కాలువకు తాగునీరు అందిస్తుండగా, రేపటి నుంచి హెచ్‌ఎల్‌సీ కాలువకు కూడా తాగునీటి సరఫరా ప్రారంభం కానుంది.

జలాశయం నుంచి విడుదలయ్యే నీటిని సద్వినియోగం చేసుకోవాలని అనంతపురం, కర్నూలు, బళ్లారి జిల్లా ప్రజలకు అధికారులు సూచించారు. పెద్ద మొత్తంలో వరద నీరు వస్తే తప్ప సాగునీటి విడుదల ఉండబోదని స్పష్టం చేశారు.