తుని చిన్నారి జ్ఞానేశ్వరి కేసులో కీలక మలుపు: పెంపుడు కుక్క అనుమానాస్పద మృతి, పోస్టుమార్టం

తునిలో తప్పిపోయిన రెండేళ్ల చిన్నారి జ్ఞానేశ్వరి కేసులో ఈరోజు కీలక పరిణామం చోటుచేసుకుంది. ఆమెతో పాటు వెళ్ళిన పెంపుడు కుక్క అనుమానాస్పద స్థితిలో మృతి చెందింది. కుక్క మృతికి కారణం తెలుసుకోవడానికి పోలీసులు పోస్టుమార్టం నిర్వహిస్తున్నారు.

ఎనిమిది రోజుల క్రితం పామాయిల్ తోటలో తన తండ్రి వెనుక వెళ్ళిన జ్ఞానేశ్వరి అదృశ్యమయ్యింది. ఆ సమయంలో ఆమెతో పాటు పెంపుడు కుక్క కూడా వెళ్ళింది. 500 మందికి పైగా సిబ్బందితో గాలింపు కొనసాగించినా ఇప్పటికీ ఎలాంటి ఆచూకీ లభించలేదు.

నిన్న సాయంత్రం ఈ కుక్క ఒక్కసారిగా మృతి చెందడం అనుమానాలు రేపుతోంది. ఇంతకుముందు చాలా యాక్టివ్‌గా ఉన్న ఈ కుక్క ఎలా చనిపోయిందనేది తేలాల్సి ఉంది. పోస్టుమార్టం రిపోర్ట్ లో విష ప్రయోగం జరిగినట్లు రుజువైతే, చిన్నారిని కిడ్నాప్ చేసిన వారే కుక్కను కూడా చంపి ఆధారాలు లేకుండా చేసి ఉండవచ్చని పోలీసులు భావిస్తున్నారు.

ఈ కేసును పోలీసులు తీవ్రంగా పరిగణిస్తున్నారు. అదనపు బలగాలను మోహరించారు. ప్రభుత్వం కూడా ఈ మిస్సింగ్ కేసుపై ప్రత్యేక దృష్టి పెట్టింది. పోస్టుమార్టం నివేదిక వచ్చిన తర్వాత దర్యాప్తు మరింత వేగవంతం కానుంది.