తునిలో రెండేళ్ల చిన్నారి 10 రోజులుగా ఆచూకీ లేదు: గాలింపు కొనసాగుతోంది

కాకినాడ జిల్లా తుని పట్టణంలో రెండేళ్ల చిన్నారి జ్ఞానేశ్వరి కనిపించకుండా 10 రోజులు గడిచాయి. పోలీసులు, NDRF, SDRF, హనుమాన్ టీమ్‌లతో గాలింపు చర్యలు కొనసాగుతున్నాయి. మూడు థర్మల్ డ్రోన్లతో అడవిని జల్లెడ పడుతున్నారు.

చిన్నారి తన ఇంటి సమీపంలోని 40 ఎకరాల పామాయిల్ తోటలో శనివారం మధ్యాహ్నం కనిపించకుండా పోయింది. తల్లిదండ్రులు రాత్రి 7 గంటలకు పోలీసులకు సమాచారం అందించారు. ఆ రాత్రి భారీ వర్షం కారణంగా చిన్నారి జాడలు, వాసనలు కొట్టుకుపోయాయి. దీంతో స్నిపర్ డాగ్స్ ప్రయత్నాలు విఫలమయ్యాయి.

కేసులో కీలకంగా మారిన పెంపుడు కుక్క, చిన్నారితో పాటు తప్పిపోయి మూడ్రోజుల తర్వాత ఇంటికి వచ్చింది. కానీ ఆ కుక్క ఆకస్మికంగా చనిపోయింది. దీనిపై అనుమానం రావడంతో దానికి పోస్ట్మార్టం నిర్వహించారు. నమూనాలు విశాఖపట్నం ల్యాబ్‌కు పంపారు. రేపటిలోగా నివేదిక రావొచ్చని అధికారులు భావిస్తున్నారు.

పోస్ట్మార్టంలో కుక్కకు విషం ఇచ్చినట్లు తేలితే కిడ్నాప్ కోణంలో దర్యాప్తు ముమ్మరం చేస్తామని పోలీసులు చెబుతున్నారు. అటవీ జంతువుల దాడికి ఆధారాలు లేకపోవడంతో ఈ కోణాన్ని పరిశీలిస్తున్నారు. సెల్‌ టవర్ డేటా, 38 సీసీటీవీ ఫుటేజీలు తనిఖీ చేసినా ఎలాంటి ఆధారాలు దొరకలేదు. దొండవాక, సీహెచ్ అగ్రహారం గ్రామాల్లో ప్రతి ఇంటికీ వెళ్లి పోలీసులు విచారణ జరిపారు. తల్లిదండ్రులు ప్రేమ వివాహం చేసుకోవడంతో, ఎవరితోనైనా వివాదాలు ఉన్నాయా అనే కోణంలోనూ దర్యాప్తు సాగుతోంది. గణేష్ (తండ్రి) తల్లిపై కొంత అనుమానంతో, ఆమెను కూడా ప్రశ్నిస్తున్నారు.