ఖరీఫ్ సీజన్‌లో పసుపు సాగు: రకాల ఎంపిక, విత్తన శుద్ధి, యాజమాన్యం సూచనలు

ఖరీఫ్ సీజన్ ప్రారంభం కావడంతో పసుపు రైతులు సాగుకు సిద్ధమవుతున్నారు. అధిక దిగుబడి సాధించాలంటే రకాల ఎంపిక, సరైన యాజమాన్యం పాటించాలని నిజామాబాద్ జిల్లా కమ్మరపల్లి పసుపు పరిశోధన కేంద్రం శాస్త్రవేత్త విద్య తెలిపారు.

తెలంగాణలోని ఆదిలాబాద్, నిజామాబాద్, కరీంనగర్, వరంగల్ జిల్లాలు, ఆంధ్రప్రదేశ్‌లోని శ్రీకాకుళం, విశాఖ, తూర్పు-పశ్చిమ గోదావరి, కృష్ణా, గుంటూరు, కడప, కర్నూలు జిల్లాల్లో పసుపు సాగు విస్తారంగా ఉంది. ప్రస్తుతం దీర్ఘకాలిక రకాలు విత్తుకోవడానికి అనువైన సమయం అని విద్య చెప్పారు. స్వల్పకాలిక రకాలను మే రెండవ వారంలో, మధ్యకాలిక రకాలను జూన్ 15 లోపు నాటాలి. దీర్ఘకాలిక రకాలను జూన్ 15 నుంచి నెలాఖరు లోపు విత్తుకోవాలి.

తెలంగాణకు అనువైన రకాల్లో దుగ్గిరాల రెడ్, ఎర్రగుంటూరు, సేలం, లకడాంగ్ ఉన్నాయని, లకడాంగ్‌లో కుర్కుమిన్ శాతం ఎక్కువగా ఉంటుందని విద్య తెలిపారు. విత్తన మోతాదు ఎకరానికి 600-800 కేజీలు (పిల్ల దుంపలయితే), తల్లి దుంపలయితే 800-1000 కేజీలు సరిపోతుందన్నారు.

విత్తన శుద్ధి తప్పనిసరి అని, దుంప కుళ్లు నివారించడానికి కార్బన్ డైజిమ్ (2 గ్రాములు/లీటర్) నీటిలో 45 నిమిషాలు నానబెట్టాలని సూచించారు. ఆర్గానిక్ పద్ధతిలో ట్రైకోడెర్మా విరిడీ పొడి 1 కేజీ 20 లీటర్ల నీటిలో కలిపి 25 కేజీల విత్తనానికి శుద్ధి చేసుకోవచ్చన్నారు. విత్తన శుద్ధి చేయకుంటే నాటిన తర్వాత కార్బన్ డైజిమ్ ద్రావణాన్ని మొక్క మొదలు దగ్గర పోయాలని చెప్పారు.

ఎరువుల విషయంలో చివరి దుక్కిలో రెండు ట్రక్కుల పశువుల ఎరువు, 250 కేజీల వేప పిండి, 50 కేజీల సూపర్ ఫాస్ఫేట్, 25 కేజీల పొటాష్ వేయాలి. నాటిన 45, 60, 90 రోజులకు యూరియా, వేప పిండితో పైపాటు చేయాలి. నీటి యాజమాన్యంలో డ్రిప్ ద్వారా రెండు రోజులకోసారి కనీసం రెండు గంటలు నీరు పెట్టాలి. కలుపు నివారణకు ఎండాకాలంలో లోతు దుక్కులు దున్నడంతోపాటు, విత్తిన తర్వాత పెండిమెథాలిన్ 1.3-1.6 లీటర్లు లేదా అట్రజిన్ 2 ml/L నీటిలో కలిపి పిచికారి చేయవచ్చు. కలుపు కనిపిస్తే చేతి కలుపు తీయడం మేలు.

పసుపు పంట తొమ్మిది నెలలు భూమిలో ఉంచితేనే బరువు, దిగుబడి పెరుగుతాయని, ఎనిమిది నెలలకే కోస్తే నష్టం వస్తుందని విద్య హెచ్చరించారు. ఆకులు ఎండి పసుపు రంగులోకి మారి రాలిపోయే సమయంలో కోతకు వెళ్లాలి.