త్విష డెత్ కేసు: గిరిబాల సింగ్‌పై నిందితురాలిగా ముద్ర, మూడు నోటీసులు జారీ చేసిన భోపాల్ పోలీసులు

త్విష మరణం కేసులో ఆమె అత్తగారు, మాజీ న్యాయమూర్తి గిరిబాల సింగ్‌ను భోపాల్ పోలీసులు అధికారికంగా నిందితురాలిగా ప్రకటించారు. దర్యాప్తులో సహకరించడం లేదని పేర్కొంటూ పోలీసులు ఇప్పటివరకు ఆమెకు మూడు నోటీసులు జారీ చేశారు.

భోపాల్ పోలీస్ కమిషనర్ సంజయ్ కుమార్ మాట్లాడుతూ, గిరిబాల సింగ్‌కు మూడు నోటీసులు పంపినట్లు స్పష్టం చేశారు. అయితే ఆమె తనకు ఒక్క నోటీసు కూడా అందలేదని చెప్పడం పోలీసు వాదనకు పూర్తి విరుద్ధంగా ఉంది. గిరిబాల సింగ్ తాను పోలీసులకు సహకరిస్తున్నానని పదే పదే చెప్పినా, పోలీసులు ఆ వాదనను పూర్తిగా తోసిపుచ్చారు. ఆమె అంటిసిపేటరీ బెయిల్ రద్దు కోసం కోర్టులో దరఖాస్తు చేసినట్లు కూడా పోలీసులు తెలిపారు.

త్విష భర్త సమర్థ సింగ్ 10 రోజులపాటు పోలీసులకు చిక్కకుండా తప్పించుకున్నాడు. అతనిపై లుక్ అవుట్ నోటీసు జారీ అయిన తర్వాత, జబల్‌పూర్ కోర్టులో సరెండర్ చేయడానికి వెళ్ళగా కోర్టు అందుకు నిరాకరించింది. ఆ సమయంలో అక్కడే ఉన్న భోపాల్ పోలీస్ బృందం అతన్ని అదుపులోకి తీసుకుంది. అతన్ని అదుపులోకి తీసుకున్న తర్వాత రాత్రి 3 గంటలకు పూర్తి విచారణ ప్రారంభమైంది.

త్విష మృతదేహంపై రెండో పోస్ట్‌మార్టమ్ కోసం ఢిల్లీ AIIMS నిపుణుల బృందాన్ని భోపాల్ AIIMS కి రప్పించే ప్రయత్నాలు జరుగుతున్నాయి. ఈ కేసులో CCTV footage, నకిలీ CPR వంటి అంశాలు కీలకంగా మారాయి. సమర్థ సింగ్‌ను ఆశ్రయించిన వారిపై కూడా చర్యలు తీసుకుంటామని పోలీసులు హెచ్చరించారు.